Friday, March 14, 2008

أحسن الله عزاكم

Hello there me darlingZ :D
لا تخترعون حياتي ... ما في عزا-الله يحفظ لكم حبيبينكم من كل شر يا ربي يالله
لكن السالفة وما فيها إني أبي اتحلطم كعادتي دائماً ... هيهي
وأزف من خلال مدونتي هالأوادم المو سنع اللي رافعين لي ضغطي
إي والله...
أزمة اللهم يا كافي
!مسببين لي أزمة

سؤالي لقارئتي العزيزة... تخيلي معاي عمري-بعيد الشر عنكم- إن توفى من عندكم شخص قريب
وأنتي فديتج قاعدة بالعزا تبجين هالغالي اللي راح وعويناتج-بعد عمري عليج- صار حجمهم الدبل من كثر ما هم مورمين من البجي
أوتصوري معاي إنج سرحانة بذكرياتج عن هالحبيبة اللي إنتقلت لجوار ربها وويهج يا قلبي صاير ليمونة ومنقلب كركم من قلة النوم والأكل بسبة حزنج
تخيلي-إسم الله عليج- أنتي بهالحالة اللي ما يعلم فيها إلا رب العالمين
وتهل عليج هالمكحلة ... مو بواقي كحل ... لأ
مكحلة
خطة كحل من هناااا لي هناااا
يكون تبي توجبج وتعزيج
أوتخيلي تواسيج واحدة لاطخة لج الويه بالفاونديشن والبودر-يعني عشتو
Natural look
وعويناتها تتلاقط جنها قطوة من العدسات الملونة
أو تنمد لج إيد تبي تسلم عليج, والأظافر توهم
Fresh
مصبغين بالصالون
تطالعين الويه لكن يقطع عليج تركيزج ال
Puff
اللي مسويته بشعرها لكنها مع هذا ما قصرت... عفسته لج من ورا وربطته أي شي على بو مقدرة إنها رايحة عزا
تخيلتي كل هذا حبيبتي؟
قولي لي الحين ... شنو يكون شعورج؟

...قبل فترة رحت أعزي واحدة من رفيجاتي بوفاة يدتها
دخلت... سلمت على أهل العزا وعزيتهم كلهم ... دورت لي على مكان فاضي أقعد فيه
طبعاً ما يحتاي أقول ... الأوادم تهذر وتسولف جنهم بتسيورة مو عزا
قلت آخذ لي جزء أقراه على روح المرة وايد أبرك لي... شوي... ولا تيي تسطر يمي واحدة
أنا لا شعورياً إلتفت عليها وبعدين رديت كملت قراءة
حبايبي... تعرفون لما تشوفون شي وتوخرون ويهكم عنه بعدين تستوعبون إنكم شفتوا شي المفروض ما ينشاف, يقوم ويهكم غصبٍ عنه يلف مرة ثانية بإتجاه اللي شافه بسرعة شوي وتكسر رقبتكم؟
يوم الإخت سطرت يمي وإلتفت عليها شفت سيقان
إي والله سيقان... بس أنا-الله يخلف علي- ما إستوعبت
يوم درت ويهي عنها جان تكفخ الصورة بمخي
إلتفت عليها مرة ثانية وأنا مو مصدقة... هو!... كاااااااا... سيقان مسفطين... وكل واحدة فيهم شوي وتصير طولي تبارك الله
...هديت القرآن اللي بيدي وقعدت أتمقل فيها
إلا الإخت "شقراء ولكن" معفسة الشعر جنها واحدة وراها طباخ أو غسيل
مو معترفة بشي إسمه شيلة لكنها وللأمانة لابسة ذيك العباية الكويتية المقطوطة عالجتف
واللي صراحة مادري شالحكمة منها, لأنها مخليتها مبطلة
وتحتها توب مادري شلون قايل ... ما ركزت فيه
وتحت تنورة قصيرة قطن أم كشاكش مالت بحر, عرفتوها؟
!!والله العظيم
ونعال زنوبة-وأنتوا بالكرامة- هم ملوت بحر وأصابع ريولها-إسم الله عليها- جنهم بلح الشام من كثر ماهم حلوين
ومصبغتهم بلون السنة-بذاك الوقت
Coral
اللي هو يكون
Orange 3ala pinkish
نفس لون الشعاب المرجانية

لأ ...يعني صويحبتي هذي توها ياية من الشاليه؟... بتروح الشاليه؟
... مادري صراحة
أنا إحترت فيها وين كانت ووين بتروح
بس مؤكد إن مو عزا

يعني قلنا إن اللي تبي ترزز عمرها وتتزوج تروح عروس وتعزي-حتى لو أوادم ما تعرفهم
وتكشخ وتاخذ أمها وياها الصالحية أو الراية-مو رفيجاتها
لازم الأم ... علشان تبين كأن الأم اللي يارتها معاها
لأنها إذا طلعت مع رفيجاتها تبين أشكره إنها قاعدة تجز
عرفتوا شلون؟
يعني آمنا بالله ... ورضينا بهذا كله
!!لكن عيب ... والله العظيم عيييييييييييييييييب
راعوا مشاعر الناس ... حسوا فيهم
ترى الإحساس نعمة
طيح الله حظ إبليس أكثر مما هو طايح ... صج قلة سنع

21 comments:

Q80 Blogger said...

يا انا ما افهم
يا الكلام صعب

نص المصطلحات مافهمتها الصراحه
يبيلي كورسات قويه من هل جانب


بس فهمت انه في عزا حريم

عظم الله اجركم :P

ezain_kilah said...

لوووووووووول

وليييه! عد بالله معاي جم كورس الحين لازم نعطيك ... واحد حق كورس ال ظ و ض ... أثنين حق تضبيط شكل المدونة ... ثلاثة حق المصطلحات اللي مادري شنو إهي

حإيإي-على قولة المصريين- ... نو كومنت ;D

فريج سعود said...

زين مو يايبة ويها لابتوبها وشابكة بالعزا

ezain_kilah said...

سعود:
لول مو هذا اللي ناقصنا إحنا ... إنت إنطر علينا شوي وبتشوف العجب

الله يستر علينا وعالمسلمين

الخيلاء said...

صاجه ..

لا حيا ولا مستحى .. صاروا مايعرفون السنع و كل شي عندهم عادي ..

حتى الخلف اختلفت معاييره عند هالاوادم ..

قولي هاذي يايه اتخلف عليهم .. موتج لي دخلتي الخلف و اهل ا لخلف اهما الي سوالف و بناتهم فاونديشن و الشيلات ناطحات سحاب امهات الدبابيس جنهم قرون استشعار ..

استغفر الله حتى الموت ماصار له هيبه

Anonymous said...

شسالفة؟؟
فهمت نص الكلام

وقدرت أستنتج إلي ما فهمتة

بالنهاية
أنا ما أدري بس أحب أحط أعذار للناس

يا الزاين كلة

لنفترض إنة عندج عزا اللة لايقولة

واليوم ثالث وأخر يوم

ولظرف ما احد الناس المقربين أو البعاد منج يحبج ويبي يواسيج لكن هالوحدة معزومة عالعشا او وراها طلعة فما تقدر تعزيج وترد بيتها وتمكيج وترد تطلع

وتحبج وتبي توصلج شتسوي ما تييج ولا تحط الكحل وتيي؟؟

ما ادري أتركلج الجواب


وعموما كلامج صح عيب احط الاشياء إلي قلتيها وماعرفتها و تروح العزا بس لو ظرفها مثل اللي قلتة؟؟

ezain_kilah said...

الخيلاء:
يا حيا الله من يانا ويا هلا ومرحبا بالغالية :D

إي والله! لا حيا ولا مستحى

حمودي:
دوم مبتسم ياربي يالله

متحسف:
حياك الله أخوي والساعة المباركة اللي مريتنا فيها :D

الله يهنيك على هالخصلة اللي رب العالمين معطيك إياها

وهي إنك تحس بغيرك وتعذرهم

لكن ياخوي في مواقف ما يبيلها عذر وفي ناس مو كفو-بعيد عنك

أما سالفة العزيمة ... فصارت لي من قبل ... مسحت مكياجي وعزيت بعدين رديت حطيته وطلعت

وبيني وبينك طال عمرك إذا كلش كلش عزيمتي كانت بكفة وغاليتي اللي بعزيها بكفة ثانية ... فما يبيله... طار فيها شيطان عزيمة واحدة ما راح أتمكيج فيها

وحياك الله دوم :]

Unknown said...

هذى تدور ريل بعد ما يبيله موضة العزا

الله يهدينا ويهديهم

Mok said...

كله دعلانه :)

عثماني said...

الله بالخير اخيتي الزين

الحريم ...صج مشكلة هالحريم

:)

كويتي متعصب said...

يعني يا كله يا خله !!!
شالحريم !!!
يا تيي امبهذله أو متمكيجة !!
مشكـلة هالنوعيات
يبيله من يزفهم زفه تفشلهم :)

joy said...

انا كتبت عن هذا الموضوع اقريه

وصاجة خويتي انا دايما احط نفسي مكان هالناس لا اراكم الله مكروها

ezain_kilah said...

mishari:
هلا فيك أخوي

!إي والله صادق... اللهم آمين

mok:
لأ لأ! البدلية ... البدلية ... أنا ما أقدر على جذي حدها قوية

لول إي طال عمرك انا كله "دعلانة" ... هيهي
:p

عثماني:
يا حيا الله عثماني!! وين هالغيبة حجي؟
لو نوعك تتغلى يعني؟

هيهي ... إي والله إحنا مشكلة

متعصب:
يا حيا الله من علق بمدونتنا

:D

!فعلاً يبيلهم... عندك إياهم

joy:
يا هلا وغلا

زين تسوين عمري

ووياج أجمعين :D

Mok said...

الزين كله

متعمد اقول دعلانه على لغة اليهال:)

يا القزمة :P

darkness said...

ويه اذا و انتي ساكته و صاخه محترمه حزن غيرج ما توعين الا رنع ذاك الصوت

اهو عربي و الا غربي

ذيج الاغنيه اللي ما ادري شلون قايله

و ترد عليه صاحبته و تكعكع

و الا اللي رايحه الصالون تستشور شعرها تقول للي تسوي شعرها لا تنشينه بستشوره حق عزا

@@

طبعا انا بققت عيوني

جان تكملها بعد ما خلصت يلا حطو لي مكياج عزا

!!!!!!!!!!!


ترى لا تعليق ترى عيب والله عيب


مره رحت عزا انا ويهي اصفر و اهل العزا على سنقت عشره

لابسين خواتم الماس و تراجي ترطخ


ليش مستانسين؟؟


خل اسكت جني زودتها او زياره و اتقرطم

:p

strawberry said...

:///

madry shagool fashlona allah yfashlhom

bas yemken elbent kant bmkan ma yamdeha temsa7 9b`3 el2a`9afer

o0 fy nas waid ma talbs lafa mo `3al6 bas aham shay el3abat we7tram msha3er elnas l2ana 3aza mo 3ers

allah yahddehom

5roofa said...

لووووووووووول وااي امبي حجيج يوووووووووونس

احس كويت قديييم انتي زوغه لوول

و استغفرالله عادي تصدقين الحين من صج البنات لي بيتزوجون يروحون عزا امبي انا حسبالي اول اشاعه بس بعدين استوعبت انه من صج السالفه استغفر الله

و عادي في الحين افا عليج بعزا يحطولج بفي و يكخون في نفس الاجانب الي تشتري نفنوف اسود و تروح العزا خصييص

لول امبي تره نو الناس
استغرف الله و عظم الله اجركم حبيبتي ربي يمسح على رفيجتج و يصبره

salamz sweetee...

Aldenya said...

يا كثر هالنماين اللى تبط الجبد

والعزا استغفر الله يتحول لي عزيمة

تسمعين دب دب دب دب

وقر قر قر

وسوالف وضحك خشيشي

والقرآن محد يستمع له

واهل العزا ما يحطون لهم حشيمة

شي يبجى بصراحة

:/

Hamad Alderbas said...

انا ما يبط جبدي الا عزا المقبرة بعيد عنكم

هناك الناس بتصف دور توها مصلية وصاكه فيها الدنيا واهل المتوفي صاكه فيهم الدنيا وتلقين بالصالة صوب الزحمة العالم ورورورورور

ماتقدرين تفرقين ان كنتى في عزا بالمقبرة والا بعرس الناس تروح تتعظ وهذيله طايحيله سوالف وضحك

ezain_kilah said...

mok:
!أنا قزمة؟

أنا مو قزمة غنت اللي طويل زيادة عن اللزوم

بعلم عليك أمي ... إيهي إيهي إيه -يعني قاعدة أبجي

:p

darkness:
تقرطمي يبا وطلعي كل اللي بقلبج عمري

الساعة المباركة اللي نورتي فيها المدونة ****

فراولة:
ده إنتي غلبانة وعلى نياتك ياختي

إلهي ما يوركيش يوم وحش قادر يا كريم :D

أبلة خروفة:
تونسج العافية يا عمري :]

إي والله الناس ينوا

لا ... وقعدوا بعد

الحمدلله والشكر ... اللهم العفو والعافية

دن-دن:
إي والله يا وخيتي

ناس إستغفر الله ما يهزهم هازوز ... قطيعة تقطع العدو

ezain_kilah said...

حمد:
لول

آسفة يا خوي سقطت سهواً

سبقتني وعلقت وأنا قاعدة أكتب الرد على إخوانا بس ما عليه... صرت بروحك ... سبيشال

!شعليك؟ يا إنت

:p

وعديمين الحيا هذولي يعلهم يضحكون من سرهم علشان يتأدبون

!عمى بعين إبليس