الله يهنيهم!

http://freej.ae/AR/about-freej-ar/about-freej-ar.html

سؤال لأولي الألباب ...شنو قاصرنا؟

مادري الله غاضب علينا ...استغفر الله ياربي ولا شنو بالضبط؟! أهل الإمارات أهلنا وكل خير الله يعطيهم إياه يفرحنا وهذا حالنا مع كل إخوانا سواءً في الخليج...وطناالعربي ...أو أي ديرة في أرض الله الواسعة

يفرحنا تقدم غيرنا وهذا مو غريب علينا, بس اللي بيموتني قهر... ليش العالم كلها تتطور وإحنا محلك سر؟! ليش عايشين بدوامة من استجوابات مالها أول ولا آخر...وزراء يستقيلون بمجرد مواجهة أول مشكلة...تسيُب فظيع وحالة طاغية من اللامبالاة في الدوائر الحكومية؟! ...يبا هذي الكويت اللي قاعدين نتكلم عنها...الكويييييييييت...الكويت اللي أتحدى اي واحد يسمي لي دولة في التاريخ قامت من العدم في فترة قياسية...ولا أحد يقول لي إنها قامت بفضل الخبرات الأجنبية... صج إستعنا فيهم...بس عيال الديرة ما خلوا ولا بقوا على وظيفة ما اشتغلوا فيها...هذا غير اللي سافر وتعب ودرس علشان يتعلم له تخصص يديد يفيد ديرته فيه...إنزين والإبداع بالرياضة؟ ...الإعلام؟...المسرح والتلفزيون؟... الإهتمام بتعليم المرأة وتثقيفها وخروجها للحياة العملية؟ وغيره ...وغيره؟ هذا كله ما يؤكد إن أهل الكويت هم أهل الإبداع والتطوير؟

عيل شنو يعني؟ ...منظولين؟! يبا إذا جذي مكة ترا كاهي...قريبة...جم طيارة محملين بماي زمزم ورشوهم عالديرة وفكونا! ولا هالحالة اللي إحنا عايشينها

يا جماعة ترى رب العالمين يقول إنه لا يغير ما بقوم حتى يغيِروا ما بأنفسهم, ورسوله-صلى الله عليه وسلم-يقول:"كلكم راعٍ ...وكلكم مسئول عن رعيته"...يعني بالعربي جذيه التحلطم ما يسوي شي...وحجوة "لو كنت المسئول..." هم ما تجيبش همها على قولة إخوانا المصريين...واللي قاعد يصير بالديرة كل واحد فينا مسئول عنه

لا ييأس أحد ويقول أنا شنو بيدي أسوي؟! ... اشتغل.. أدري يا فلان إنك تشتغل وغيرك ماخذ الترقية وهو دوام مثل العالم والناس مو قاعد يداوم... وأدري إنج يا فلانة أدائج ما في أحسن منه وفوق هذا مسئولج/مسئولتج حاطين عليج غير حطة... أدري إن التقديروالتشجيع صاروا مثل حمارة القايلة والطنطل ... نسمع فيهم ولا نشوفهم... والتنسيق الله بالخير... والأفكار اليديدة للتطوير على ما تتنفذ يكون عفى عليها عليها الزمن وهي نفسها يصير يبيلها تطوير... لكن الدنيا لا تزال بخير دام في ناس تحرص على مصلحة الديرة ومعطية طاف لتكسر المجاديف هذا كله...ماشين بطريجهم يا جبل لا يهزك ريح... إذا هالناس تخلوا عن دورهم, شبقى علينا بعد؟

وحده الشغل اللي يفيد...الشغل وبس...اشتغلوا على تحقيق أحلامكم وطموحاتكم كلها... اللي في راسكم هاتوه...نبشوا بأوراقكم القديمة... طلعوا هالملفات المغبرة ...ترى اللي منكم على باله إن عنده حلم مات من زمان, أقول له روح إلحق عليه! قاعد ينازع وناطرك تسويله إنعاش!!... عمر الأحلام ما تموت إلا بموت أصحابها-لنا ولكم طولة العمر والصحة والعافية

فتقفون واللي يرحم والديكم ووالدين والديكم...لحد يقول مالي خلق...ماكو فايدة...أنا شنو اقدر أسوي...ربنا ما خلق كل واحد فينا وحطه بهالدنيا إلا لأنه-سبحانه-يعلم الخير اللي ممكن يسويه واللي -بمشيئته- راح يسويه..."لا تحقِرن من معروف"...هذي حجوة رسولنا لنا-عليه افضل الصلاة والسلام

أدري الدنيا تلاهي وتاخذ البني آدم بلويتها, وأدري إن البيروقراطية اللي المتفشية عندنا ضيم...وساعات الأهل-الله يهداهم-يعسرون ولا ييسرون...هذا غير صعوبة تحويل الحلم إلى واقع ملموس والجهد المبذول لتحقيقه يهد جبال...والاحتمال الوارد للفشل يخلي الواحد ممكن يصرف النظر عن تنفيذ أي فكرة حلوة تطري على باله...بس هم... أرد واقول...إحنا قدها وديرتنا تستاهل