#$%()*&^%$!@#

قواكم الله حبايبي! شلون دنيتكم؟ إنشاالله دوم بخير ياربي يالله

أنا الحمدلله تمام بس على بالي جم شغلة...أوكي قبل لا تخترعون...ماراح أتحلطم نفس المرة اللي طافت
كل ما هنالك إني قاعدة أفكر بصوت عالي-أو بالأحرى أون لاين-...تعرفون لما تواجهكم صعوبات بحياتكم وتتمنون لو الزمن يرجع فيكم للوراء شوي؟ للوقت اللي كانت فيه أموركم أقل تعقيد وأوضاعكم مرتاحة أكثر... نفس لما تكونون بالشارع, تدخلون عند لفة وتلاقون السيايير من الزحمة كأنها تمر مجبوس بتنكة, فتقومون ترجعون قري وتخلون الجم سيارة اللي وراكم...هم ترجع قري...وتربكون الشارع وتزحمونه أكثر مما هو مزحوم, وتاخذون لكم جم هرن ويمكن جم سبة مني ولا مناك, بس في النهاية تطلعون من هالزحمة وتاخذون طريق ثاني مريح يوصلكم للمكان اللي تبونه؟

بس في الحياة الواحد ما ينفع يسوي جذي...أدري ما قلت شي يديد ولا أثريت العالم بإكتشاف خطير, بس السالفة وما فيها إن حضرتي...هيهي...توني أستوعب...إي والله

الإنسان الله يعلمه وايد أشياء في حياته, بس المعرفة شيء والإدراك شيء آخر, والهانم أنا-ولو إني لي الحين مزمزيل بس كيفي...أبي اسمي عمري هانم-كنت أعرف إن حياة البني آدم فيلم ما ينعاد ولا يتمشى أو يتسوى له
pause

ما فيه غير
play & stop

الأولى تكون بولادته والثانية بمماته ...لنا ولكم طولة العمر والصحة والعافية والمغفرة من رب رحيم

بس اللي ياب هالطاري إني قبل شوي كنت قاعدة أفكر في حياتي وقلت في نفسي:"واي! جان زين يرد فيني الزمان لي سنة ورا...قبل لا ..." ...ولا بلاش بعدكم صغار على هالسوالف...لول ...أتغشمر...بس ساعات أفكر...يا ترى شلون الحين بتكون حياتي لو ما طقيت الباب وفتح لي إياه؟ لو سمعت كلام "فطيم" وما نزلت من السيارة وتليقفت-كالعادة؟ لو كنت سامعة كلام أمي وما طلعت وياها من البداية؟ بس الواحد شيسوي بوكاحة البنات اللي ما يسمعون الكلام وحوبة أمهاتهم...بس معقولة شوفتي له حوبة؟...ماظنتي...على الأقل ما ودي أظن...يحليله...مادري شخباره

يمكن تكون حياتي الحين بالمقارنة فيها قبل سنة أكثر تعقيد, خصوصاً وإني الحين قاعدة أحاول إني أحل جم مشكلة بوقت واحد-مو خبركم أنا الزين كله بس إسم الدلع "أفروديت"- لكن من وقت لي الثاني ما أقدر إني أوقف تفكير فيه وفي إن العفسة اللي بحياتي بسبته, مع إنه فقير ما سوى لي شي...أنا اللي شفته وانثولت...بالرغم من عدم إيماني ب "الحب من اول نظرة" وهالخرابيط...ولو هو حلو ويقط الطير من السما جان قلت "إي والله! حسنه فتان"...بس المصيبة إنه ما في زود...هو صج مملوح وطينته خفيفة وإبتسامته تينن...إي والله ...إي والله... بس شفت اللي أحلى وما صار فيني جذي! ...لكن اهو غلطان بعد وما قصر...تحرش وخلاني أتعلق فيه أكثر وفوق هذا قل حياه علي...على باله إني واحدة هبلة بيقص عليها-طيح الله حظ إبليسه أكثر مما هو طايح!-...بس أرد وأقول

أهو ماله شغل إذا أنا أهملت حياتي, وعشت على هامشها, وصار ما عندي شغلة ولا مشغلة غير إني أفكر فيه, لأن حياتي اهي اللي بتتأثر سلبياً بهالتهبيب اللي قاعدة أسويه, أما اهو...فمو داري عن هوا داري

والواحد بهالدنيا غصباً عن عينه مو بكيفه, مجبور إنه يمشي بشوارع الحياة-وإن كانت زحمة-لآخرها, وما يعترض على حكم رب العالمين أو يتبطر على نعمته, لأن مصايبه ممكن تكون عند غيره نعم

إنشاالله تكون الرسالة وصلت, والعبرة إنفهمت, خو إحنا ما ننشر غسيلنا ببلاش, ولا شلون؟