It's 2oo8!

hellooooooo dearz!

طبعاً أنتوا تعرفون المبدع "ناصر القصبي" مال طاش ما طاش؟ ... واحسرتنا! ما تعرفونه؟!

عاد كيفكم... أبي كل واحد فيكم يتخيله يقلد لهجة أهل الحجاز مدري وين ... اللي كلامهم قالب سعودي على مصري

ومرة واحدة تخيلوه إنه قلب بنية... مسيكين! هلقت بالريال... ما عليه... أمون :P

مرة مو بحلو الموديل

الدنيا كلها محتفلة طول الليل

وإحنا بس اللي قاعدين بالبيت

أففففف... والله مليت

إيش هزا؟!

شما أسوي ماني قادرة أستمتع ... أبغى أحس باللزازة

معقولة يكون فيروس الكآبة حاشني في القلب؟

مدري والله ... مو بعيدة

هالدنيا بنت ك*ب

تتحين الفرص لتغدر بالإنسان

وتخليه مو دال طريقه ودوم في همومه سرحان

بس لاااااااااا

على مين تلعبها؟

أنا واعية لحيلها وفاهمتها

بحتفل يعني بحتفل

ولا أنا ليه ماخذة إجازة من هذا ... إيش إسمه؟... إيوة! الشغل

بتفل عن شمالي بوجه إبليس ثلاث مرات

وأرمي الزعل بسبع جمرات

وبونس نفسي وهيص

وأغني نشاز والسغير قبل الكبير برقص

وبعد السواني في إنتزار السنة الجديدة

عساها يا ربي تكون عالجميع سعيدة

.... قبلاتي و

Habby Na'u Year :]

طارت الطيارة

طارت عنا الطيارة؟!

شنو يعني؟ محنا مسافرين؟

كلموا "ناسا" تطرش لنا صاروخ

شوفوا لنا عربانة تجرها حمارة

حسبي الله ونعم الوكيل

حتى البانزين خلص من السيارة

ولو بنترسه ماكو فايدة

الوقت تأخر وكلنا تعابة

ملينا من الزحمة ودخنا من الفرارة

وروسنا عورتنا وإحنا نسأل انفسنا شلون طارت عنا الطيارة

شششششش..... كل من ساكت

كل من بينام على ضوء الشوارع الخافت

شوي ... ولا كل من بدا يقط اللوم على الثاني ومزهب أعذاره

كل من بدا يلمح

الكل وده يصرح

الصوت علا

ومعظم النيران تبتدي من شرارة

كل هذا وأنا ميتة من اليوع ومو حاصل لي حتى خيارة

الله يسامح طاقم الطيارة

للأمانة التأخير كان خارج سيطرة أي واحد فينا

والله صج!... مو عيارة

الفكرة بالأساس كانت إن إحنا نروح السعودية

حق خوالي في المنطقة الشرقية

منها نعايدهم ومنها زوارة

ونرد ديرتنا عن طريق البحرين

من خلال هالمملكة الجميلة اللي كانت في يوم من الأيام إمارة

صراحة... اللي يشوف شموخ ابراجها اليوم

ما يصدق إنها بالأمس كانت مطشرة فيها جم عمارة

كفو والله!

جذي تكون النهضة

مو إحنا اللي شغلنا صاير كله خوارة بخوارة

مدري هو غضب من رب العالمين علينا؟ مدري هو سوء إدارة؟

يا ترى إحنا تنقصنا الخبرة؟

ولا مشاكل الديرة أعقد مما نتصور ومحتاجة جهود جبارة؟

يا ترى إحنا متعمدين نكون عين عذاري؟

ولا هذي ببساطة يسمونها هدارة؟

أتصور الأجوبة واضحة وما يبيلها شطارة

أخخخخيييييييييييييييييييييييه عليج يا كويت

والله خسارة

جرب فيج كل عليمي

حاصل على أعلى الدرجات في الثوارة

كله بالواسطة

والمصيبة يتباهى فيها ويقولها بصريح العبارة!

قلبي قلبج يا ديرتي

لعب بحسبتج كل راعي مصلحة

كل نذل في منتهى الحقارة

ذيب متنكر بثوب نعجة الإصلاح

المنفعة همه... الطمع في عينه... والدين ستاره

السموحة

مو كلهم

في ناس الدين هو قلبهم قبل لا يكون قالبهم وأطهر من الطهارة

وفي من الناس الرها هو شعاره

ضعيف نفس ... مسنود الظهر

يرتكب أبشع الجرايم وما يهمه إنه يخفي آثاره

يشخر في نومه وعيون عشاقج سهارى

تغمض تحاول تقرا مستقبلج

دمعها يهطل ...يدعي ... إن باجر إييبلج بشارة

أوه!

إندمجت معاج يالغالية

وسرحت في همومج ونسيت هالفقارى!!

بعد إذنج بس

أكمل لهم شلون طارت من غيرنا الطيارة

جسر الملك فهد من الزحمة كان راح يفيض سيايير

وأصحابها كانوا دفشين وفي منتهى القذارة

إيي من ورا وبقدرة قادر يصير جدام

واحد ... إثنين... عشر!

معقولة كلهم بيلحقون على الطيارة؟!

غير النقص الرهيب في الموظفين اللي في رايي الشخصي هو سبب هالعسارة

ما أطول عليكم...

الإزدحام إغتصب وقتنا وبرخيص باعه

تسإلوني عن الإقلاع؟

هيهي... بقى عليه أقل من ساعة!

خالي أعلن إستنفاره

داس وبتون

يبي يلحق قبل لا تطفي الإشارة

ويوم وصلنا

استقبلنا الموظف بإعتذاره

البوابة سكرت

مالكم حل... ماكو جارة

إلتفتنا على بعض وكل واحد يقول للثاني

ما عليه... كل تأخيرة فيها خيرة

وهالحكمة بحد ذاتها تنسف اي إحساس بالمرارة

من يدري؟

يمكن باجر نضحك ونقول

أشونا طارت عنا الطيارة

Happy 3eed 6oo UUUUUU!

كل عام وانتوا بخير حبايبي وعيدكم مبارك :D

حالياً انا محتلة لابتوب بنت خالتي وقاعدة اكتب لكم هالبوست من ربوع المملكة العربية السعودية ... هيهي ... مسيكينة صلعت مني أو على وشك

أوكي انا بس حبيت أعايدكم وأقول لكم إني احبكم وااااااااااااااايد ... وااااااااااااااااااااايد ***************

مضطرة أخليكم الحين حبايبي... بروح أجز في مجمع الراشد اللي مو اقل هلاقة من الأفينيوز

c u next week dearz :D

الأفنيوز

بعد رحنا الأفنيوز
ما نمل منه ... ما نيوز
ماجنه راحت عليه وصار
Old newZ
عاجبتنا الهلاقة
ما شبعنا من الحبربش اللي قمة في الطفاقة
ما قدرت اكسر خاطر هلي
ما لقيت في قلوبهم شفاقة
يوم قالوا لي المكان اللي نبي نروح له انصفق ويهي جني واحد توه أحد طاقه
نبي نستانس... نبي نحس بالرواقة
مو نرد من طلعتنا تحوشنا كوابيس
مالي خلق... والله مالي مجاجة
وبعد رحنا الأفنيوز
شيشكي منه الراية أو الصالحية؟
على الأقل الواحد يشوف له جنطة... بوك ولا حتى
ShoeZ
أوأعيش الدور مثل بعض الناس وأشوف لي مملوح أسلم عليه يكون مشبهة... بعدين اقول له
Oh! ExcuZe
إنزين مطاعم وكافيهات مارينا
يا سلام لما نقعد عالبحر ونقضي عالرمل أحلى سنينا
نسمع مكسات راب على هبان
R & B
على موسى فيروز
والجو الحين وايد أحلى من لما كان في تموز
جريمة هذي بحق الجزيزة
والله ما يجوز
بس أنا ما سكت
رفعت شعار المعارضة وتمردت
وانمد بالأشبار البوز
لكن رغم هذا أدري إنه لنا روحات حق الأفنيوز

Wanted!

Hey 7abaybee :D

How'z it going my dear readerz n readerzaty?

ماشي الحال ولا راكض على ريل واحدة؟ هيهي

هالبوست هذا اللي قاعدين تقرونه قاعدة اطبعه حالياً من الدوام-بكل فخر... لول

أدري شريرة لأني مو قاعدة أشتغل بس في قلبي وايد اشياء تقرقع... يعني شلون؟ أخليها تقرقع؟؟؟ والله

المهم... انا اليوم -إنشاالله- بودي لابتوبي أصلحه, يعني المفروض أمتعكم بطلتي البهية على بلوقاتكم وأتحفكم ببوستاتي النكتة في القريب العاجل يا ربي يالله, فاللي ما عنده بلوق يحط له علشان يشوف الإبداع

بس أنا -الله يخليني لأميمتي ولكم- بغيتكم تساعدوني بشغلة ما عليكم أمر.... يعني تبون

Free Entertainment?! ما يصير!

مالي خلق ألونها... لونوها أنتوا entertainment

بس نرجع لموضوعنا...سلمكم الله الشغلة وما فيها ... ولا تدرون شلون؟ خلوني أقول لكم على السالفة من البداية, خو إهي خربانة ...خربانة, كفاية توني رادة من إجتماع-ولو إنه ما كان مثمر- بس إسمه شغل, صح؟

فكفاية علي شغل اليوم وخليني أسولف لكم شوي ;p

مثل ما أنتوا خابرين حبايبي-حبكم ربي وحبني وياكم- إن المحروسة" أنا" تموت عالسيايير, فأول امسات كنت قاعدة اسولف ويا شريكتي في الجريمة- رفيجتي- "فطمطم" عن العن-دييدات... سالفة يرت وراها سوالف... قالت لي إنها مشتهية تاخذ لها ماكينة نم-نم عنونة من السكراب وتلعب فيها ورديت عليها عيل أنا... توه رئيسي مر ... فشلااااااااا... المهم... شكنت قاعدة اقول؟؟... إي!... رديت عليها عيل انا مشتهية سيارة كلاسيك من ملوت ألف وتسعمية وحطبة و

I PimP It!

http://www.streetracersonline.com/flash/pimp.php

فقلت لها بس ما أقدر لأن يبيلي آخذ كورسات بالميكانيك والحدادة والصبغ وهالسوالف وأعيش الدور نفس

American Chopper :)))

أوكي لا تضحكون انا من صجي قاعدة اتكلم... أو أطبع-بمعنى أصح... بالثانوية وايد استمتعت بمواد الصناعي... الكهربا...النجارة, وحتى بالجامعة الورشة كانت وايد تونس... صج ما كانوا يخلونا نسوي شي مفيد يامال إبليس الشقول... "بنات... نخاف تتعورون" ...ناناناناااا...والله... بس فالحين يخلونا ننشر الصفايح بمناشيرهم الدايخة.... الناس تطورت... تستخدم الليزر... والله

وإياني وياكم أحد يقول لي:"وييييييييع! دهن ووصخ وأشياء... يااااااي!!" ... لأني راح أرد وأقول... اللي يغير حفاضة ياهل حايشه إسهال وما همه إنه يتوصخ أو تلوع جبده, يتراوالي ما راح تفرق معاه تغيير زيت سيارة, ولا شلون؟ مو في النهاية إحنا حريم وهذا "شغلنا"؟ ... بلا حلى

المهم...فقالت لي فطوم إن قبل جم سنة من أيام ما كنا بالثانوية-يعني سبع... ثمان سنين- سمعت إن في دورات من هالنوع عند ال

KT

فزفيتها لأنها توها تتحجى وقمت ... هم مر رئيسي... إستغفر الله العظيم... يعني الواحدة ما تعرف تكتب بوست أثناء الدوام؟!

وين وصلت؟ ... إي... وبعد ما خلصت منها دقيت على 808080 وإضطريت إني اسمع دعاياتهم البايخة واللي تبط طبلة الإذن حتى لو السماعة على بعد متر, وخذيت رقم النادي... دقيت عليهم امس, ردت علي هندية منفسة وحولتني على واحدة ثانية من مكان ما من الشام

الثانية اهي الفيلم! شي... شيييي مو طبيييييييعي!!

التحفة: النادي الدولي للسيارات

أنا بصوتي الناعم وبمنتهى الذرابة: السلام عليكم. لو سمحتي أنا حبيت استفسر عن انشطة النادي

التحفة اللي سايحة على عمرها: ما في انشطة, النادي بس لليسن الدولي

أنا: إي حبيبتي عندي خبر بس أنا سمعت إن من قبل جم سنة نظم النادي دورات في الميكانيك و...

التحفة قاطعتني وبتنهوص ماله داعي جنها بتبجي: مافي دورات! النادي بس لليسن الدولييي وما عندنا هيك دورات!! و

جان اقاطعها: إي حبيبتي فهمت, بس أنا سمعت إن من قبل جم سنة كان فيه وحبيت اعرف شنو اهية الأماكن اللي يعطون فيها هالدورات

جان ترد بأعصاب وحالة التنهوص مستمرة معاها: مافي دورات! في نادي للسيارات والرالي هو يمكن اللي عنده, إحنا ماعندنااا

هني بطت جبدي بس كنت محافظة على هدوئي: إي إختي أعرفه هذاك اللي بقرطبة ما عندهم-وهني قعدت اكلمها شوي شوي جنها واحد ما يعرف عربي- أنا أقصد من زمان... أول... قبل حوالي ست سنين ... حبيت أتأكد من اللي سمعته وأعرف هالدورات الحين وين يسوونها-واستدركت بسرعة- أدري إن النادي ما ينظم هالدورات الحين مثل ما تفضلتي, بس أكون شاكرة لج لو تحوليني على شخص يفيدني

هني التحفة طخت شوي والحمدلله استوعبت وبدون تنهوص قالت: والله أنا جديدة هون وكلنا ما صار لنا بالنادي ست سنين, بس إنتي يمكن يفيدك المدير بس هو مو موجود

أنا: طيب ممكن تعطيني رقمه؟

التحفة: إتصلي على نفس هالرئم بتطلع لك السكرتيرة

أنا: إنزين ممكن تحوليني على السكرتيرة؟

التحفة وبوادر التنهوص رجعت بصوتها: إتصلي على نفس هالرئم! هي اللي ردت عليكي اول مرة!!

أنا: أوكي ... مشكورة

*************

elhindiya elmnafsa: hello?

me: hello?

elmnafsa: hello??

me: Hi! وأنا مخترعة منها Good evening. I wanted to ask about some courses that were held by KT

elmnafsa بإستغراب: what kind of courses?! the club is for international liscence only!

me: ya i know but i heard KT had some courses in car michanics n ...

elmnafsa: no! this is a club not for car mechanics!! you go to shuwaikh

me بعد ما صحيت من البوهة اللي طقتني بسبة ردها: i know! خو أنا كل شويتين مطيحة بهالشويخ بسبة حوادثي but the club did organize some of these courses few years back. may i speek to the manager?

elmnafsa: he's not here. regarding?

me عقب ما لاعت جبدي: the courses! ... i want to ask him IF these courses were held by KT, then where are they held know? may i have his number?

elmnafsa: no but you can give me yours n he will call you when he arrives

تهجيت لها إسمي بطريقة تانجو ... ألفا وعطيتها رقمي, بعدين حولتني على واحد... يا سلام... شوفوا الفرق في التعامل؟ أنا آمنت وصدقت إن ما في انذل وأنحس من الحريم بينهم وبين بعض ومن الرياييل بينهم وبين بعض! بس خيصير تعامل بين جنسين مختلفين... قمة الذرابة والإحترام والسنع

أخونا في الله: ألو؟

أنا: السلام عليكم. لو سمحت أخوي أنا سمعت إن النادي كان ينظم دورات بميكانيكا السيارات من قبل ست سنين او اكثر, وأدري إن النادي ما عنده هالدورات الحين بس اكون شاكرة لك لو تقولي وين يسوون هالدورات

أخونا في الله: إختي أنتي الظاهر قصدج على نادي السيارات والدراجات الآلية

أنا-هني صج فولت بس صامدة: أخوي لأ! أنا أعرفه هذاك اللي بقرطبة-بغيت أقول له والله أدري عندي عضوية بالنادي... والله العظيم تلاتة أدري

أخونا في الله: والله عزيزتي أنا ما صار لي وايد هني وأنتي قاعدة تتكلمين عن النادي من ايام الخالدية وأنا ما عندي فكرة صراحة بس اقدر أعطيج رقم شخص يفيدج

أنا: إي الله يعافيك... أكون شاكرة لك

أخونا في الله: العفو... عزيزة

طبعاً أنا طفارتي ودم ضروسي الريال لما يكلمني بذرابة زايدة ويقول لي عزيزتي ومدري شنو, بس من بعد العاهتين اللي كلمتهم حسيت إن هالآدمي غسل لي جبدي بأدبه وتعاونه

الحين الريال ما قصر عطاني رقم شخص بالنادي المفرووووووض يساعدني... هاي هاي واي واي... تهقون منو يا أطفاااااااال؟

التحفة! صح! صفقوا لعمركم

الشكوى لله :(

أوكي حبايبي أنا مضطرة امشي لأن الدوام خلص ... إي والله... يعز علي اخليكم خصوصاً وإني ما كملت لكم باجي الفيلم, بس يكفيني إني تحلطمت شوي وقطيت جم نقزة, بس عزائي إن في منكم من راح يفيدني ويجاوب هالسؤال

وين ينظمون دورات حق ميكانيكا؟

ورجاءً لحد يستخف دمه ويقول لي جابلي ميكانيكي بواحد من هالجراجات لأني راح افشش توايره... لووووول

خلكم مساندين ومتعاونين الله يعافيكم ماله داعي للنحاسة, فتحوا مجال بالشارع وخلوا غيركم يطوف- عسى الملايكة تطوفكم عند ابواب الجنة يا ربي يالله

اللي ما يعرف فيكم جواب سؤالي اكون أكثر من ممنونة له لو يسأل لي واحد من ربعه يحب السيايير...أو واحدة تسأل أخوها إذا تمون عليه... شي ... شياتين ... تصرفوا

Till then... i leave you with hugz n kisses xoxoxo

لووووووووووووول

قواكم الله حبايبي :D

سوري إني مقصرة معاكم بس لابتوبي خربان-بعيد الشر عنكم, وقاعدة أحصل الإنترنت بطرق تقدرون تقولون إنها ملتوية شوي...ههههه

وقتي ضيق على هالإنترنت كونكشن اللي عندي إياها وما اقدر أرد على كل تعليقاتكم حبايبي, بس هذا رد مخصوص على أخونا العزيز ولد الديرة

http://wildildeera.blogspot.com/2007/12/blog-post.html

والله إنت قلبك متروس

شكله الجيب مشقوق وتطير منه الفلوس

صدقت!

في وايد حريم مخهم من السوقة ملحوس

همهم التفشخر لإشباع شي فيهم بالمظاهر مهووس

جم واحد شايل هم؟

جم واحد حاس بغم؟

جم واحد بسبة هالديون في السجون محبوس؟

بس نرجع لك يا مظلوم

لا تعتب عالوالدة-الله يحفظها- ولا تقط عليها اللوم

إنت اللي يبته لنفسك

إي نعم!

إنت وكل واحد سوا وبيسوي فعلك

قطيت عمرك في بحر بدون ما تعرفه... بدون ما تاخذ وقتك

ياما شباب وبنات على بالهم ميدان الزواج سهل

جنه مول لكل واحد متملل وبخاطره يتمشى ويحوس

وأهالينا -الله يهداهم- يستخدمون كل وسائل الضغط...وحيييل ... دووووس

جنه علل يبون الفكة منها أو هم عالقلب مكدوس

بس حلفتك بربك

لي غابت عنك ما تحس إن اللي غابت شمسك؟

أو لي قبلت عليك وانت مو معطيها ويه... ما يفز لها قلبك؟

ولا لي شفت هالجسم...

ما تقول يا حلوها! ويا حلو هالثغر المبتسم؟

كل هالصحة من جم سندويشة وقنجة مجبوس؟

أما الشعر... فاسمح لي... موديلك قديم

أو معلوماتك مو ذاك الزود بالحريم

الناس قالت شِعر بهالشَعر وطوال الشوارب للمس خصلة منه مستعدين يناطحون تيوس

أما القصر... فطول ما إنك اطول منها فالآدمية ما عليها بأس

أفا عليك بس!

لا يقص عليك الشيطان وييبك روس

منت فقير-الله يزيدك من نعيمه

ولا انت متعوس

منت متقبس-اسم الله عليك

ولا انت منحوس

كل ما في الموضوع إن ميزان أمورك شوي معفوس

يبيله صبر منك ومن عقلك هالراكز قرار مدروس

ولا تنسى إن الطيبة هي الأصل في النفوس

عسى الله يهديكم ويسخركم لبعض ويجعل لكم من العافية ملبوس

ويكون لكم الخير بكل طريق لابد وبكل زاوية مدعوس

مطلوب حالاً!

أدور بهالسكيك بعد ما صارت غرفتي سجن

في عيوني غيم مطره عيَا بقلبي يندفن

والكلمات تتسابق على لساني ومو لاقية إذن

أرجع لداري...

أندعس بفراشي...

أحاول أنسى همي وأغطي عيني بهالجفن

أصحى ألاقيها ما ذاقت طعم النوم وتزيد أحزاني حزن

ما عليكم أمر... شوفوا لي حضن

حضن يحبني

بكل عيوبي

بكل إينوني يقبلني

عفية... شوفوا لي حضن

حضن... ضحكة عيونه صفا

لمسة إيدينه شفا

شفاي تبوسهم ظهر وبطن

تقفووون! شوفوا لي حضن

أرفع راسي للسما...

أشوف القمرة تطالعني وتبتسم

شالفايدة وانتي ما عندج الإيدين اللي تلم؟!

بشروا؟... عسى لقيتوا لي حضن؟

مو أنا كان عندي واحد

بس أخخخخ... خرَب علينا حاسد

واللي في بالي من غير شي من وقت للثاني موكلني ت*ن

مع هذا كنت اطوف

أسوي عمري ما أفتهم جني واحد متخلف

ودمعي ما فكر في لحظة عليه يمن

لكن ظلمه لي يوم عن يوم في زيادة

والمصيبة مو راضي يعترف بغلطه من يباسة راسه وعناده

لدرجة انبنى بيني وبينه حاجز هالمتن

أواه عليك يالحضن!

أدري إني بعد ما قصرت

الله يسامحه...

وصلني لمرحلة معاها... خلاص... طفرت

بس هم المفروض قلبه علي شوي يحن

يلومني مرة... يعاتبني بكلمة او نظرة

وفي النهاية كل خير فيني يظن

مو جذيه يكون الحضن؟

حسافتك والله!

ما هقيت إنك بهالسهولة عني تنفتن

ما توقعت إني في حبك أنغبن

لأ! هذا وسواس من المنلعن

غلاي في قلبك كبير... كبير

ما ينوزن

عيل ليش رافض تسمعني؟

ليش مصر من حنانك تمنعني؟

ليش تخليني من ألمي أون؟

شدعوة يا حافظ؟!

ليش مو راضية تعطيني حضن؟

أبي رد لإعتباري

أبي رد لإعتباري

أبي أحد ينقذ لي كرامتي من الإهدارِ

أبي أحد يمنع هالمهزلة من التكرارِ

أبي رد لإعتباري

تعبت من الملاحق

مليت من هاللعبة

اللي فيها ولد إبليس القطو

وأنا ما غيري الفارِ

أبي رد لإعتباري

عيب

قاهرتني هالكلمة

ذابحتني هالنظرة

اللي محرمة علي إني أثور لكرامتي

أو حتى أييب لهالموضوع طاري

أبي رد لإعتباري

قطعة شورت...بنطلون...دشداشة أو وزارِ

بالنسبة له التطاول علي مستباح

كأني واحدة من الجواري

ما فرقت وياه إذا أقط الطير من السما

أو أخلي المنظرة ودها تلوذ بالفرارِ

عادي عنده إذا أنا سفور أو عيوني مو مبينة من خماري

كله واحد

لأن الحبيب بس همه يتسلى ومن ثم... ساري

أبي رد لإعتباري

على باله إني إذا شفته راكب الهومر أو يبتون بالفراري

اللي أقرب ماله ماخذها سلف أو مو بعيدة بالأجارِ

بتنهد وأقول...يا عمري نظرتك هيضت ناري

إخذني البر...البحر...إنشاالله سفاري

جود أضبطك ويصير عرسنا في نهاية الشهر الجاري

لا حول ولا قوة إلا بالله...أبي رد لإعتباري

أبي واحد يقدر أنوثتي

وهذا من حقي...ما في داعي للإنكارِ

لكن بنفس الوقت يحترمني

وما يجرحني بالرذيل من الأشعارِ

أكون له همسة...فكرة...بسمة

مو ضحكة لأصدقاءه ومدعاة للإفتخارِ

يخاف علي من نفسه

ويسكني وسط روحه في قصر عالي الأسوارِ

أبي واحد يرد لي إعتباري

تغطية نص كم لندوة مقصلة الرقيب

مراحب يا حبايب :D

بما إن القائمين على بلوقر-الله يخليهم لنا ويطولنا بعمرهم- أتاحوا لي الفرصة إن يكون لي صوت عالإننترنت وأصير كاتبة, فانا قلت ليش ما أعيش الدور أكثر وأصير صحفية؟

اسمعكم تقولون "واحسرتنا!" بس بسوي نفسي صمخة...المهم...سبب إن التغطية نص كم هي إني-وبلا فخر- وصلت متأخرة كالعادة...هيهي... فبالتالي تغطيتي الصحفية غير كاملة

يوم وصلت كان اللي معاها الميكروفون "ميس العثمان" ...أعتقد هذا إسمها...المهم وكانت قاعدة تختم كلامها, فما اقدر أعلق على الكلام اللي قالته...من بعدها "عقيل العيدان"...وهو شخص أول مرة أشوفه وأسمع فيه

بشكل رئيسي النقطة اللي تمحور حولها كلامه كانت عن حق كل شخص في حرية إختيار ما يقرأ, وإن بدون هذه الحرية يكون الإنسان ناقص في فهمه وإدراكه لما حوله لأن الرقيب لم يسمح له بالإطلاع على كل ما حوله! وبالمناسبة...كان واضح من سرده للأمثلة إنه مقتنع بأن أحد الدوافع من وراء الرقابة "تربوي"-وهالكلمة مني- يعني إن السلطة ممثلة بالرقيب قاعدة تلعب دور الوالد الذي يملي على أبناءه ما هو مسموح وما هو محظور لتتشكل شخصيتهم وفق قالب من صنعه تتناسب مع ما يراه وتتفق مع هواه, بالإضافة إلى دافع آخر...دافع تعسفي...يعني إختلاف الرأي ...يفسد للود كل قضية

بس الأستاذ "عقيل" كان مركزاً في حديثه على موضوع الرقابة على الإنتاج اللأدبي والفني, وناشد الحضور على الرفض و"الإشتغال"-وهذي حجوته-ضد الرقابة

لكن د. "خليفة"-لا تسإلوني عن إسمه الكامل لأني ما أدري-قام بمداخلة أكثر من رائعة عندما فُتح باب النقاش من قبل الحضور...نبه على إن موضوع الرقابة أعم وأشمل من الرقابة على كتاب, وإنه حكومتنا-صاحبة القرار-بات من السهل التأثير عليها عن طريق نواب مجلسنا, وهم في معظمهم معروفة توجهاتهم وطبيعة فكرهم, وإن بالإستمرار على هذه الحال فإن الكويت ستفقد ميزة من أهم مميزاتها كدولة قامت على التعددية, إضافة لحقيقة أنها "كانت" منارة الحرية في الخليج, فبالتالي "يجب أن نحرص ألا تكون اصواتنا الرافضة للرقابة مجرد رد فعل على حدث", وأن تستمر لتعلو أكثر من الأصوات الأخرى, لأنه هو صاحب الصوت الأعلى...يكون صاحب الصوت المسموع من قبل الحكومة

مداخلة أخرى رائعة من قبل مدرسة مساعدة في كلية الحقوق, طرحت من خلالها سؤال مهم...ما هي قانونية الرقابة؟

ما عجبني تعقيب الأستاذ "عقيل" عليها لأنه يرى بأن المهم الآن أن نقوم بتحركات مبدئية ضد الرقابة, من ثم نتعمق أكثر في موضوع قانونيتها

لكني-شخصياً-أخالفه الرأي, لأن من خلال معرفتنا لوضع الرقابة من الناحية القانونية وتصدينا لها في هذه الناحية, سنقطع شوط كبير في حلنا لهذه المشكلة لأن سيتم مواجهتها من جوانبها العديدة في ذات الوقت

هذا غير مداخلة من شاعر لبناني-هم بعد اول مرة أسمع فيه- إسمه...هممم...هنري...أوكي...زين مني حفظت الإسم الأول...المهم...مداخلته كانت جميلة جداً في شحذه لهمتنا...قال إن الرقيب طوله بطول المقص...لكن إحنا-الرافضين لهالرقابة-طولنا بطول نخل الكويت... "وما طول المقص لنخلة من الكويت؟"...وشبه المعرفة اللي الرقيب قاعد يحاول إنه يمنعها بالنهر الدافق اللي ماكو شي يوقف بطريقه, واستشهد بحادثتين من فرنسا عن كتب تم منعها واضطهاد مؤلفينها..."الكتب بقت"...فعلاً الرقيب يروح وإيي غيره لكن الكتاب اللي حاول منعه وتشويهه بمقصه باقي...غصباً عن عينه-هذي الأخيرة مني


للأمانة أنا تعمدت إني أطوف مداخلتين لأني مالي خلق أكتبهم, وحدي دايخة وفيني النوم وقاعدة أحاتي شلون راح أقعد حق الدوام باجر...قلت لكم...تغطية نص كم

dood night 7abayby *********

حاضرين...وحق الخراب زاهبين

هو ناقص؟

والله عيب! والله حرام هذا اللي قاعدين تسوونه بالديرة! يعني علشان تطالبون بحقوقكم تظلمون غيركم؟! ولا الغاية تبرر الوسيلة؟

الإضراب له أصول, ومو كل مجال يتحمل خسايره, بفهم شنو ذنب هالناس اللي تعطلت مصالحها؟

just for you

أنا قايلة إن اللي يجاوبني راح ياخذ مني دعوةمخصوص

فهذي مني لك...روح عسى الله يوفقك ويسدد خطاك ويفتح ابواب الخير بويهك دنيا وآخرة مثل ما إنت قاعد تنبش اصل الخبر وتوصله لنا مثل ما هو بدون إضافة الشائعات وتكملتك للفراغات اللي يسببها مقص الرقيب
يا عاجل يا ولد أم عاجل

أدري إني بشكل جزئي ينطبق علي المثل اللي يقول "شين وقواة عين", بس هم الساعة تكون لو انتوا مسوين ندوة مو إعتصام

وأنا معاك...في الندوة تحاتي الناس تمل وتحرص على إنك تكون مستحوذ على إنتباهم الكامل, لكن الإعتصام ممكن يكون-وغالباً ما يكون- صامت ويستمر لفترة طويلة تبلغ أيام متواصلة, فيكفي معاه إثارة فضول الحضور ليدرك إن فيه إحتجاج ضد الموضوع الفلاني, من خلال اللافتات وتجمع المحتجين

ما يحتاج تشكرني حجي, هذا اقل واجب نسويه تجاه ديرتنا لإنقاذها من براثن القوانين العوية اللي تارستها, يجوز إن ما الله كتب إني أكون فعلياً جزء من الإعتصام لكن أنتوا ما قصرتوا وكفيتوا ووفيتوا والشكر موصول لكم والدعوة بالتوفيق لكل من يخاف على هالأرض الطيبة ويسعى لخيرها

بس إنشالله رقبتك ما انكسرت بسبة صورة "الحاوية المفولة" لأني نسيت أسوي لها
rotation ;p

شالسالفة؟

مادري أنا مافهمت ...مادري انفص علي...مادري أنا طافني شي وأنا مادري

حياكم الله حبايبي, وله مني دعوة مخصوص اللي ينورني فيكم ويجاوب هالسؤال...الحين مو المفروض يكون في إعتصام اليوم ضد الرقابة جدام معرض الكتاب الساعة السادسة مساءً ولا انا متوهمة؟

صج إني وصلت ساعة ونص متأخرة-لظروف خاصة خارجة عن إرادتي, بس حتى يوم سألت هناك قالوا لي ماكو شي وما كان في شي! ...بعدين معقولة إعتصام وإعتصام وآخر شي ياخذ أقل من ساعة ونص؟! وين اللي "أشعل شمعة" وعبر عن صوتك؟ ...أنا هقيت بروح هناك بلاقي المكان متروس شموع! ما اهو إما إني فهمت غلط إن الإعتصام اليوم...أو إن كان في إعتصام والآدمي اللي سالته ما يدري وين الله قاطه...زين شالإعتصام الميني اللي أخذ ساعة ونص؟! المكان كان لا يزال مزدحم والناس كانت لي الحين قاعدة تهل... زين مو الفكرة من الإعتصام إن يكون إحتجاج سلمي على قانون جائر وبنفس الوقت توعية للحضور-وإن ما شاركوا في الإعتصام-بأهمية الموضوع ذو الصلة وأبعاده؟

معقولة ساعة ونص كانت كافية إن المعتصمين سووا فيها كل هذا؟ ولا حضرت الشرطة وتم تفكيك الإعتصام؟

أكون أكثر من شاكرة لكل من يجاوب تساؤلاتي, لكن قبل أن أنسى...كان اكثر من رائع منظر رؤية الإزدحام...إزدحام الناس بكل فئاتها العمرية لزيارة معرض الكتاب...يدل على إنه لا يزال هنالك فئة-ليست بالقليلة-لديها من الوعي والرقي الحضاري ما يكفي لأن تسرق ساعات من الحياة ذات الخطى السريعة...تسرق ما يكفيها لتغذي به عقلها من خلال قراءة كتاب او إثنين, لكن كان هنالك مناظر بشعة-بكل أسف-طغت على هذا الرقي...إنشاء الله سيكون هنالك مقالات عن هذا الموضوع...لكن أرجع للعامية وأقول...أخليكم مع هالجم صورة

#$%()*&^%$!@#

قواكم الله حبايبي! شلون دنيتكم؟ إنشاالله دوم بخير ياربي يالله

أنا الحمدلله تمام بس على بالي جم شغلة...أوكي قبل لا تخترعون...ماراح أتحلطم نفس المرة اللي طافت
كل ما هنالك إني قاعدة أفكر بصوت عالي-أو بالأحرى أون لاين-...تعرفون لما تواجهكم صعوبات بحياتكم وتتمنون لو الزمن يرجع فيكم للوراء شوي؟ للوقت اللي كانت فيه أموركم أقل تعقيد وأوضاعكم مرتاحة أكثر... نفس لما تكونون بالشارع, تدخلون عند لفة وتلاقون السيايير من الزحمة كأنها تمر مجبوس بتنكة, فتقومون ترجعون قري وتخلون الجم سيارة اللي وراكم...هم ترجع قري...وتربكون الشارع وتزحمونه أكثر مما هو مزحوم, وتاخذون لكم جم هرن ويمكن جم سبة مني ولا مناك, بس في النهاية تطلعون من هالزحمة وتاخذون طريق ثاني مريح يوصلكم للمكان اللي تبونه؟

بس في الحياة الواحد ما ينفع يسوي جذي...أدري ما قلت شي يديد ولا أثريت العالم بإكتشاف خطير, بس السالفة وما فيها إن حضرتي...هيهي...توني أستوعب...إي والله

الإنسان الله يعلمه وايد أشياء في حياته, بس المعرفة شيء والإدراك شيء آخر, والهانم أنا-ولو إني لي الحين مزمزيل بس كيفي...أبي اسمي عمري هانم-كنت أعرف إن حياة البني آدم فيلم ما ينعاد ولا يتمشى أو يتسوى له
pause

ما فيه غير
play & stop

الأولى تكون بولادته والثانية بمماته ...لنا ولكم طولة العمر والصحة والعافية والمغفرة من رب رحيم

بس اللي ياب هالطاري إني قبل شوي كنت قاعدة أفكر في حياتي وقلت في نفسي:"واي! جان زين يرد فيني الزمان لي سنة ورا...قبل لا ..." ...ولا بلاش بعدكم صغار على هالسوالف...لول ...أتغشمر...بس ساعات أفكر...يا ترى شلون الحين بتكون حياتي لو ما طقيت الباب وفتح لي إياه؟ لو سمعت كلام "فطيم" وما نزلت من السيارة وتليقفت-كالعادة؟ لو كنت سامعة كلام أمي وما طلعت وياها من البداية؟ بس الواحد شيسوي بوكاحة البنات اللي ما يسمعون الكلام وحوبة أمهاتهم...بس معقولة شوفتي له حوبة؟...ماظنتي...على الأقل ما ودي أظن...يحليله...مادري شخباره

يمكن تكون حياتي الحين بالمقارنة فيها قبل سنة أكثر تعقيد, خصوصاً وإني الحين قاعدة أحاول إني أحل جم مشكلة بوقت واحد-مو خبركم أنا الزين كله بس إسم الدلع "أفروديت"- لكن من وقت لي الثاني ما أقدر إني أوقف تفكير فيه وفي إن العفسة اللي بحياتي بسبته, مع إنه فقير ما سوى لي شي...أنا اللي شفته وانثولت...بالرغم من عدم إيماني ب "الحب من اول نظرة" وهالخرابيط...ولو هو حلو ويقط الطير من السما جان قلت "إي والله! حسنه فتان"...بس المصيبة إنه ما في زود...هو صج مملوح وطينته خفيفة وإبتسامته تينن...إي والله ...إي والله... بس شفت اللي أحلى وما صار فيني جذي! ...لكن اهو غلطان بعد وما قصر...تحرش وخلاني أتعلق فيه أكثر وفوق هذا قل حياه علي...على باله إني واحدة هبلة بيقص عليها-طيح الله حظ إبليسه أكثر مما هو طايح!-...بس أرد وأقول

أهو ماله شغل إذا أنا أهملت حياتي, وعشت على هامشها, وصار ما عندي شغلة ولا مشغلة غير إني أفكر فيه, لأن حياتي اهي اللي بتتأثر سلبياً بهالتهبيب اللي قاعدة أسويه, أما اهو...فمو داري عن هوا داري

والواحد بهالدنيا غصباً عن عينه مو بكيفه, مجبور إنه يمشي بشوارع الحياة-وإن كانت زحمة-لآخرها, وما يعترض على حكم رب العالمين أو يتبطر على نعمته, لأن مصايبه ممكن تكون عند غيره نعم

إنشاالله تكون الرسالة وصلت, والعبرة إنفهمت, خو إحنا ما ننشر غسيلنا ببلاش, ولا شلون؟

من صجكم؟

صراحة بدعتوا! ...لأ...صج بدعتوا...شسالفة كل بلوق أدشه ألاقيكم قاعدين تترحمون عالديرة؟! ليش تفاولون عليها جذيه؟

أنا عليمية...صح..ما أفهم بالسياسة...إي نعم..ماأدري عن هوا داري باللي قاعد يصير بالديرة ناهيكم عن العالم من حولنا...آمنا بالله

بس هو سؤال وجيه...لا تجاوبونا...لأ!...مشكورين وما قصرتوا, أبي كل واحد فيكم يجاوبه بينه وبين نفسه...السؤال يقول

لما أحد عزيز وغالي عليكم-الله لا يقول-يمرض...مرض جايد-الله يحفظنا وياكم والمسلمين...كلش موصل ...مرض عضال وكل ما فيه ما يترقع, ترضون أحد يعوده ويزوره ويقول لكم "الله يرحمه...عظم الله أجركم"؟

حبيبتنا مريضة...تئن وتشكي من الألم اللي فيها, وإحنا ما غيرنا دواها وطبيبها...عايشة على أجهزة الإنعاش, بدل ما تسعفونها تبون تفصلون عنها الكهربا

ما تقدرون...ما عليه...الله كريم والشكوى له...بس عاد تترحمون عليها؟

دورت على رمز لها يعبر عن اللي بخاطري...ما لقيت...رحت سويت واحد يمثل صورتها بقلبي

HELP! فقصت ويهي!

عوار القلب شلون قايل؟

يللا؟

أبي أتحلطم!

hey there 7abayby,
how'z it going? all'z well i hope

عاد كيفكم أنا بخاطري أتحلطم وراح اكتب شوي بالعربي وشوي بالإنجليزي, فتحملوني شوي... يعني أنا أكتب لكم ببلاش؟! على الأقل أنا أكتب وأعفس الدنيا على كيفي

n u gyz just kick back n relax....

Me Birtthday :D

18/10/1982

يا حظي! شالعيد ميلاد الأي شي؟

first a7ib ahanny Najmah cause...

يابت عيد ميلادي بالضبط! وأقولها

OOOOOO YA NAJMAH! 3ASHAT NAJMAH!! as 4 the rest of u guyz i congratulate u 4 being so close but tough luck ;)

نرجع للمهم...اللي اهو أنا طبعاً...تتوقعون جم واوي عايدني في يوبيلي الفضي؟

no one! except 4 u guyz, my best freind fa66ooma-6ooma, and our ex-made o bas!! :(

ask me if i went out on my B-day and celebrated it and i would answer u...

هين... طلعت طل! رحت أحوس اخلص لي جم مشوار ...لا وبعد ما خلصت كل الشغل اللي أبيه...الشكوى لله

يا رافع الجام...عطنا ويه

هالجزء هذا من البوست إهداء مني لكل واحد عديم الحيا...شايف نفسه...ومصدق روحه! ... لا يعني من صج أنا أبي أحد يفهمني يجوز أنا غلطانة أو-اسم الله علي- ما أفهم بالأصول... الحين أنا متعينة صار لي شهور...قاعد تشوفني كل يوم أسلم عالدنيا كلها بما فيهم إنت يا شقول...وترد علي بنفس خايسة...وهم اسلم...ذاك اليوم ويهي بويهك وتمر ولا كانك شايفني؟! كل هذا حيا؟ ولا أخاف بس ديانة؟! يبا السلام لله... ولا يمكني ميتة عليك وأنا ماأدري... بعد يجوز أنا ميتة عليك وانا ما أدري... ماكو شي على الله بعيد! و ماظنتي إن فيني شي في هيئتي يوحي بجذي من أساسه ولو بنفرض-وأنا لي الحشيمة والكرامة- أعتقد أضعف الإيمان إنك تقول... السلام....على الأقل من باب إحترام الزملاء

سامحوني إذا كنت محتدة شوي بس من حرتي... هالموقف يذكرني بموقف صار لي في الجامعة...أنا يوم كنت مستجدة كانوا لي الحين ما سووا منع إختلاط...ذاك اليوم دشيت القاعة قبل بداية المحاضرة علشان احط اغراضي إلا لقيت جم واحد من الشباب وبس...قلت السلام...تبون أحد يرد...ينطق...أبداً!...مايخالف...أفترض إنهم ما سمعوني...زين شماله يمشون وكأنهم شامين ريحة خايسة؟ وترى مو بس أنا اللي اقول هالحجي...وايد بنات من دفعتي...أكبر مني...أو أصغر يقولون نفس الكلام...ليش الشباب مشينين النفس جذي كأنه ميتين عليهم؟

ولا يهمكم...سالفة ثالثة...أنا نوعي لما أمشي ما أعطي ويه حق اللي حوالي بس بنفس الوقت ما ارفع خشمي... يوم كنت مستجدة بالهندسة رفيجتي كانت مستجدة بعد بس بكلية العلوم الطبية تمهيداً لدخولها الطب...حضرة الأخ اللي عايش الدور إنه "جستن تيمبرليك" كان مع رفيجتي المصونة بنفس الكلية...أخونا في الله هذا نوعه يمشي مع ربعه وعلى ويهه نظرة تقول...انتي تلحقيني مو انا ألحقج ... الحمدلله إن كان يسوي هالحركات مع رفيجتي مو معاي أنا...ماادري إذا اتضحت لكم هالحقيقة عني او لأ...بس أنا مو من النوع اللي "واي! أستحي"...حده مو موديلي...وبكل مكان أدور وأعور وأندعس بكل داعوس..أمي تقول لي أنتي صبي على هالجراءة اللي فيج؟ لو انتي صبيك أو عندج أخوان متأثرة منهم جان قلنا يمكن؟ بس محد من خواتج يسوي اللي تسوينه! عاد انا أرد بكل ثقة...اسم الله علي انا زينة البنات واحلاهم, بس إحنا في القرن الواحد والعشرين مو العصر الحجري, ورب العالمين اللي اهو رب العالمين فضَل الرياييل علينا بدرجة, ليش إحنا نروح نكبرها ونعطيها أكثر من قيمتها ونحرم على انفسنا وايد اشياء محللة من منطلق عيب أو "أنتي شفيج؟ ما تبين تتزوجين؟!"...غير بلشة ابتلشتها بعمري على بو إني بنية... لا تحبين السيايير هذي سوالف صبيان...لا تروحين بروحج مناطق بعيدة, انتي بنية المفروض تخافين...إي مو إحنا عايشين بهارلم نيويورك مو بالكويت!... شغلة زيادة عني اهي إني مو متعطلة على واحد يقول لي شزينج وشحلاتج لأني أدري إني حلوة غصباً عن عينه...ولا أرتز بالعروس يم امي واسوي روحي عاقل علشان جود واحدة تخطبني لولدها...المنة على اللي بياخذني...إي والله خوش شي... كاشخة وشحلاتي...أقعد يم امي! المهم...نرجع لهالتعيس...ذاك اليوم أنا كنت بالمكتبة أبي اطلع واتيسر أروح لبيتنا...بعد ما اروح لبيتنا؟!... المهم...انا ماشية صوب الأصانصير وسلم الطوارئ...أمشي وافكر...ها؟ آخذ الاصانصير لو انزل بالدرج؟...مع إني دقمة وكاني عقلة الأصبع إلا إن خطوتي سريعة...فانا كنت قاعدة امشي بسرعة كالعادة جان أشوف كامل الأوصاف قابل علي من الجهة الثانية هم يبي يروح الأصانصير وقاعد يمشي على كيفه...يوم شفته بطأت خطوتي وقلت انحسمت السالفة...خليه ياخذ الأصانصير وأنا آخذ راحتي أركض عالدرج وألعب شوي...هذي كانت ردة فعلي...تهقون شنو كانت ردة فعله؟...لما شافني من كثر ما إنه سرَع خطوته ما كان ناقصه إلا يركض...إي والله...ورووووح! إسبقني للأصانصير-واهو ماشاالله طول بعرض- إلصق بالباب وافتح إيدينيك عالآخر وتحضَن الأصانصير...والله العظيم...رافع إيدينه ومسندهم على بابه وساد الشاشة...أنا وقفت وطايرة بوهتي...هذا من صجه؟ من جذبه؟ أنا ماكسروا خاطري إلا هالأوادم اللي بيطلعون من الأصانصير بيلاقون هالتحفة بويهم!... نوعي بالجامعة كنت ما آخذ وأعطي مع الشباب اللي وياي لأني ادري إنهم متخلفين وتفكيرهم يروح لي بعيد...بس صراحة ما قدرت امسك نفسي من إني ألتفت عليه قبل لا أنزل من الدرج وهو ملطوع زي اللوح ناطر الأصانصير ياخذه-أخذ الله روح إبليسه- وأقول له...ميتة عليك وانا ما أدري... ونزلت ...بعدين صادفته بممرات الجامعة لقيته قاعد يخزني بنظرة...أنتي قد هالحركة؟...طالعته بطرف عيني وعطيته طاف

min ommah!

الشاهد من كل هالسوالف هذي مو إني أتفلسف وبس...إنما اتفلسف وتوصل رسالة للشباب اللي من هالنمونة تقول...عيب! والله العظيم عيييييييييييييييييييييييييييييييب!! خيصير كل عيب شرعي بالريال إلا إنه يقل إحترامه للآخرين ويستقوي على اللي اهم اضعف منه او هو مقتنع إنهم أضعف منه ويقوم يضغطهم وهو مكيِف...لا ذمة ولا ضمير...يعني... عجبتك بنية وبتغازل...غازل يا أخي محد ماسكك...غازل بذرابة ...إذا البنت تبيك اهي اللي بتلحقك ما تنطرك! بس مو على بو إنك شاطر بالسياقة تقوم تدوده البنية اللي تلحقها وتحاول تصفطها غصب طيب...وتقوم الفقيرة تدش بشبة!! ترى إنت ما ترضاها لإختك أدري فيك...مرتك...أم عيالك...مو لأنك تدري إنها مالها ظهر تلعب بحسبتها وتخوِض ببطنها...إذا انت قوي...ترى الجبار فوقك...كاهو فوقك...تشوفه؟...ما تشوفه؟... ما عليه هو يشوفك

الرسالة تكمل حق البنات وتقول...إياني ثم إياني ثم إياني...إياني وياكم تسمعون كلام اهاليكم...ترى ما وراهم إلا الخراب! يبا أنتوا أكثر من نص المجتمع...تعرفون شنوا أكثر من نص المجتمع...رب العالمين خله الجنة تحت اقدام الأمهات اللي هم منكم مو تحت اقدام الرياييل...من غيركم الجنس البشري ينقرض! ولا تقولين جود أضبط لي واحد ينجبر فيني واتزوج ...ترى الله كاتب لج نصيبج من قبل لا تطلعين من بطن امج ...روحي جدام المنظرة وشوفيه ...تلاقينه على جبهتج...ليش تنزلين نفسج للي يسوى واللي ما يسوى؟ بتحبين؟ حبي عليج بستمية عافية وعسى الله يجمع كل حبيب و حبيبته على خير...بس مو تسوين من نفسج تسلاية لكل واحد يدور له

quality time, just because u want to get married. ur damn better than this!

ماكو بنت جيكرة...ماكو واحدة عليها قاصر وبهالزمن كل شي يترقع...ليش تخلون زوير وعوير والمنكسر واللي مابراسه خير يقل حياه عليكم؟! أنا ما اقول لاسنوهم لكن الواحد من حقه إن يرد على اللي يغلط عليه...والمؤمن القوي أحب عند الله من المؤمن الضعيف ...ماشية بطريقج شحلوج...محجبة ومسترة...ماشية بإحترامج...يقوم هالما يستحي يقولج سجلي الرقم وتدودهين؟ أو تبلعينها حرة وتسكتين؟! ليش؟ ماالله امر بتعذيب النفس...ردي عليه وقولي له متى ما رضيت إن إختك أو واحدة من أهلك تاخذ رقم واحد ذيك الساع آخذ رقمك! هذا ويهي إن رد...وإذا رد وقل حياه زيادة فهذا من رداه...شفيكم؟! ترى في ناس الحمدلله والشكر يستانسون لما يشوفون البنت جدامهم متضايقة وما تعرف تتصرف...ليش تعطونهم هالمتعة؟

المهم...أنا تحلطمت بما فيه الكفاية وعطيت مواعظ وايد كاني فوزية الدريع...خلوني اروح الحين اسوي شوية دعاية وإعلان لبلوقي وأكتب تعليقات ببلوقاتكم...واتيسر أنام

nighty dearz*******

مسابقة العيد

السلام عليكم حبايبي...أقصد إخوتي في الله

خو لازم... الدنيا عيد وعقب رمضان ما يصير الواحد يقل حياه على طول جذي...على قولة أحلام-ولو إني ما أواطنها- الثقل صنعة...يعني صبروا لغاية ما أسبوع العيد يخلص

لول شلونكم؟ عسى العيد عليكم مبارك والله يجعلكم من العايدين والفايزين... بس شدعوة يا حافظ! كنت كل شوي أشيك البلوق جود ألاقي عيدية مني ...مناك...أبدا

المهم... نرجع لمسابقة العيد...سلمكم الله عيد ميلادي قريب... في الواقع اهو هالأسبوع...والشاطر/الشاطرة فيكم اللي يعرف أي يوم من اللي يايين في هذا الأسبوع...أكرر...هذا الأسبوع

آخر موعد لتسليم الإجابات الساعة الثانية عشرة بمنتصف الليل ليوم الجمعة الموافق 20/10/2007 نتائج الفائزين سوف تعرض خلال الأسبوع القادم

so... good luck ;)

الله يهنيهم!

http://freej.ae/AR/about-freej-ar/about-freej-ar.html

سؤال لأولي الألباب ...شنو قاصرنا؟

مادري الله غاضب علينا ...استغفر الله ياربي ولا شنو بالضبط؟! أهل الإمارات أهلنا وكل خير الله يعطيهم إياه يفرحنا وهذا حالنا مع كل إخوانا سواءً في الخليج...وطناالعربي ...أو أي ديرة في أرض الله الواسعة

يفرحنا تقدم غيرنا وهذا مو غريب علينا, بس اللي بيموتني قهر... ليش العالم كلها تتطور وإحنا محلك سر؟! ليش عايشين بدوامة من استجوابات مالها أول ولا آخر...وزراء يستقيلون بمجرد مواجهة أول مشكلة...تسيُب فظيع وحالة طاغية من اللامبالاة في الدوائر الحكومية؟! ...يبا هذي الكويت اللي قاعدين نتكلم عنها...الكويييييييييت...الكويت اللي أتحدى اي واحد يسمي لي دولة في التاريخ قامت من العدم في فترة قياسية...ولا أحد يقول لي إنها قامت بفضل الخبرات الأجنبية... صج إستعنا فيهم...بس عيال الديرة ما خلوا ولا بقوا على وظيفة ما اشتغلوا فيها...هذا غير اللي سافر وتعب ودرس علشان يتعلم له تخصص يديد يفيد ديرته فيه...إنزين والإبداع بالرياضة؟ ...الإعلام؟...المسرح والتلفزيون؟... الإهتمام بتعليم المرأة وتثقيفها وخروجها للحياة العملية؟ وغيره ...وغيره؟ هذا كله ما يؤكد إن أهل الكويت هم أهل الإبداع والتطوير؟

عيل شنو يعني؟ ...منظولين؟! يبا إذا جذي مكة ترا كاهي...قريبة...جم طيارة محملين بماي زمزم ورشوهم عالديرة وفكونا! ولا هالحالة اللي إحنا عايشينها

يا جماعة ترى رب العالمين يقول إنه لا يغير ما بقوم حتى يغيِروا ما بأنفسهم, ورسوله-صلى الله عليه وسلم-يقول:"كلكم راعٍ ...وكلكم مسئول عن رعيته"...يعني بالعربي جذيه التحلطم ما يسوي شي...وحجوة "لو كنت المسئول..." هم ما تجيبش همها على قولة إخوانا المصريين...واللي قاعد يصير بالديرة كل واحد فينا مسئول عنه

لا ييأس أحد ويقول أنا شنو بيدي أسوي؟! ... اشتغل.. أدري يا فلان إنك تشتغل وغيرك ماخذ الترقية وهو دوام مثل العالم والناس مو قاعد يداوم... وأدري إنج يا فلانة أدائج ما في أحسن منه وفوق هذا مسئولج/مسئولتج حاطين عليج غير حطة... أدري إن التقديروالتشجيع صاروا مثل حمارة القايلة والطنطل ... نسمع فيهم ولا نشوفهم... والتنسيق الله بالخير... والأفكار اليديدة للتطوير على ما تتنفذ يكون عفى عليها عليها الزمن وهي نفسها يصير يبيلها تطوير... لكن الدنيا لا تزال بخير دام في ناس تحرص على مصلحة الديرة ومعطية طاف لتكسر المجاديف هذا كله...ماشين بطريجهم يا جبل لا يهزك ريح... إذا هالناس تخلوا عن دورهم, شبقى علينا بعد؟

وحده الشغل اللي يفيد...الشغل وبس...اشتغلوا على تحقيق أحلامكم وطموحاتكم كلها... اللي في راسكم هاتوه...نبشوا بأوراقكم القديمة... طلعوا هالملفات المغبرة ...ترى اللي منكم على باله إن عنده حلم مات من زمان, أقول له روح إلحق عليه! قاعد ينازع وناطرك تسويله إنعاش!!... عمر الأحلام ما تموت إلا بموت أصحابها-لنا ولكم طولة العمر والصحة والعافية

فتقفون واللي يرحم والديكم ووالدين والديكم...لحد يقول مالي خلق...ماكو فايدة...أنا شنو اقدر أسوي...ربنا ما خلق كل واحد فينا وحطه بهالدنيا إلا لأنه-سبحانه-يعلم الخير اللي ممكن يسويه واللي -بمشيئته- راح يسويه..."لا تحقِرن من معروف"...هذي حجوة رسولنا لنا-عليه افضل الصلاة والسلام

أدري الدنيا تلاهي وتاخذ البني آدم بلويتها, وأدري إن البيروقراطية اللي المتفشية عندنا ضيم...وساعات الأهل-الله يهداهم-يعسرون ولا ييسرون...هذا غير صعوبة تحويل الحلم إلى واقع ملموس والجهد المبذول لتحقيقه يهد جبال...والاحتمال الوارد للفشل يخلي الواحد ممكن يصرف النظر عن تنفيذ أي فكرة حلوة تطري على باله...بس هم... أرد واقول...إحنا قدها وديرتنا تستاهل

معلش

gawakom allah my dear 7ajyeen n 7ajiyat

شلون يومكم؟ عسى أيامكم كلها حلوة يا ربي يالله...بس أنا الجم يوم اللي طافوا كانت أيامي شوي لكم عليها...الواحد لما تصير معاه مواقف بايخة والدنيا ما تمشي على هواه يطفر غصبٍ عنه... مرشح المستقبل! ...سوري نفَست عليك حجي...إنت أخوي العود وعزيز وغالي مو تشيل بقلبك على أخيتك الصغيرة, وتدلل اللي تامر فيه تلاقيه عند ريولك, شتبي بعد؟

shysamonik! truely sorry itha kint hallagt ma3ak. az u can c ur not th only one. o inshallah nshoofik ambassador in mozambee8 ;p

peace 2 u all *********

أولادنا...أكبادنا تمشي على الأرض

hey their 7abayby, i have sum good newz 4 u all mommiez n daddiez ...n future mommiez n daddiez ...or u who know future mommiez n daddiez...

الحين مو بس تقدرون تتحكمون بجنس البيبي وبس...لأ... تقدرون بعد عن طريق تقنيات بسيطة, إنكم تتحكمون في درجة الجنس!! يعني مثلاً...لنفرض إن واحد من قرائي الأعزاء يبي ولد... كل اللي عليك تسويه يا سيدي الكريم علشان ولدك يطلع ريال من قلب إن لما الله يعطيك الولد تسوي معاه الآتي

إذا طاح وبجى... تقول له عيب! الريال ما يبجي وانت ريااااااال

خله يطلع مع ربعه ويروحون الألعاب لي وقت متأخر بالليل علشان يتعلم عالطلعة والمشاوير, شلون يصير ريال إذا ما تعود يطلع بروحه؟! بس يستحسن إن تبتدي تعلمه هالطبع من صغره... يعني وهو بالمتوسط زين بس بالإبتدائي يكون وايد أحسن, ولا تحاتيه لأنك راح تشتري له موبايل علشان تقدر تتطمن عليه, وها...أبو خط كروت, علشان ما يكلفك بالفواتير ...منو راح يشتري له الكروت غيرك؟! يبا الدنيا أمان الحمدلله وانت راح تربيه أحسن تربية

إذا يتلك أمه معصبة تقول لك إن جارتكم شافته يتحرش بالبنات عند فرع الجمعية, لاتهتم وهدِيها...قول لها إن هذي حركات يهال وباجر إنشاالله بيكبر ويعقل

الدنيا كل مالها وتتطور ومافي احسن من الإنترنت كوسيلة يتعلم منها ولدك معلومات مفيدة, فحط له إنترنت بغرفته...شلون عيل؟ لازم تحترم خصوصيته

رياييل البيت هم اللي يشيلون مفتاح البيت, وولدك مسيكين...ساعات يرد البيت يلاقي أمه زايرة خواله...انت بالديوانية...والخدم سنة على ما يبطلون الباب! فخلي نسخة من مفتاح البيت معاه عن العبالة

ما في أحلى من البجي حق طلعات البر والشاليه, لكنه هم مفيد حق تقضية المشاوير البسيطة داخل الديرة, فحط بجي صغيِر ومجكنم بكراج بيتكم حق ولدك واعتبره تدريب مبكر على السياقة

الإعتماد عالنفس والإستقلالية أساس شخصية كل ريال كفو, فحسب حسابك إنك تطرشه يدرس بره, وإذا انت حاس إنه ممكن يخترب وما يفلح... ما عليه...هي تجربة وانشاالله تكون فادته بشي والريال شايل عيبه

دير بالك ثم دير بالك! مو باجر إيي يقولكم يبا, يما أنا أحب فلانة واهي تحبني, روحوا خطبوها لي... فهم ولدك وعلمه زين إن الحب ما يكون إلا بعد الزواج وأي شي ثاني قبله خرابيط وتسلية لا أكثر...كا إنت وأمه شزينكم... خطبة أهل وعايشين مع بعض من أروع ما يمكن ولا ضركم...بعدين شلون تخطب له واحدة هو كان يعرفها؟! لازم تعقله وتفهمه إن مثل ما تحبه ممكن تكون حبت غيره

أما حق بنياتنا حببيباتنا, مربيات الأجيال...الدرر المكنونة والجواهر المصونة أقول حق أمهاتهم

عوديها تلعب بالباربيات والببيبي بورن وسوالف البنات فقط لا غير, مو تروحين دلدلدل تشترين لها

Bob The Builder, Thomas The Train, Pokemon...

هذي سوالف صبيان وإياني وياج تخلينها تلعب مع إخوانها, البنية الحلوة الشطورة تلعب ويا البنيات اللي مثلها

كل شي ولا البنطرون! البنية صغيرونة ولازم تحس إنها غير عن الصبيان, ولا يعني تبين البنية تكبر وتتعقد؟! إذا كبرت شوية ذيك الساع لبسيها بنطرونات وإذا انتي أو أبوها عندكم قناعة إن البنطرون حرام يكون أحسن بعد

علميها إذا أحد أذاها او ضايقها أو غلط عليها إنها ما ترد, وتيي تعلمج وانتي تتصرفين...طبعاً أنتي ما راح تسوين شي و بتهدينها وتقولين لها ما يخالف حبيبتي الله يسامحهم

نبهي عليها إنها ما تندعس بأي داعوس ولا تمشي بالظلمة بروحها, هي بنوتة والدنيا تخرع

مو تقعدين كل شويتين تمدحين ببنتج وتتحلين عليها جنج مو مصدقة إن عندج بنية, بعدين تصير واثقة من نفسها زيادة عن اللزوم والغرور موزين

لازم تنبهينها على أخطاءها وتصححينها لها علشان تتعلم, وأنتي امها وأدرى بمصلحتها

إذا كبرت وصارت حريمة كشخيها ورزيها بكل مناسبة, ولا تخافين إنها تصير أكبر من سنها, هذا كله علشان مصلحتها...جود إييها نصيبها

مو تخلينها رايحة رادة عالثلاجة بكيفها! بعدين تمتن, وين تحصلين لها ريل؟! وعلميها عالذرابة وهي تاكل, يعني ما تشرب البيبسي من العلبة على طول...لازم جلاس... وإذا ماكو عود مصاص, ولما تروحون مطعم خليها تطلب شي ما فيه حوسة ولوية وايد حتى لو مشتهيته, وختخلي شوية أكل بالصحن حتى لو ما شبعت...الناس شتقول؟! بنتهم مفجوعة ولحسَت الصحن

نبهيها إن إذا واحد تحرش فيها ما ترد ولا تلتفت وكأنه مو موجود مهما قال أو سوا لأن البنية المؤدبة ما ترد ولا تلاسن, ولا شلون؟

مهم جداً إنج تشجعين بنتج كل ما سوت شي زين وتقولين لها الله يبلغني فيج وأشوفج عروس ببيت ريلج

خليها تحرص إنها تتعلم وتاخذ شهادة ...باجر ما يفيدها إلا معاشها, بس وجهيها لتخصصات حلوة ومو متعبة وفي مجال إنها تتزوج بسرعة...مدرِسة مثلاً... وإذا أصرت بنتج على شي ثاني...ما عليه...خليها...باجر الله بيرزقها بولد الحلال اللي يستر عليها وبتقعد بالبيت وتقابل بيتها وعيالها

لما يتقدم لها أحد زين بس هي مو عاجبها لسبب سخيف مثل إنه دمه ثقيل...عقليها وفهميها إن الريال الزين ما يتطوَف والحين أحسن البنات

قاعدين ببيوتهم ومو لاقين رياييل, فختلحق على عمرها أحسن لها

هذي كانت مجموعة من النصايح والإرشادات العامة لتربية أبناءنا الأعزاء, اللي فيكم يبي ولده يكون ريال أكثر أو بنته مرا اكثر أو أقل زيدوا الجيلة من عندكم أو قللوها حسب الرغبة

في أمان الله...وخافوا ربكم في عيالكم

ezain iz out.....

الله لا يحرمنا

صبحكم الله بالخير حبايبي,

خططتوا وين راح تجزون ... أقصد تروحون بالويكند؟ إي عفية عليكم, أنا شعاري "لا تؤجل جز اليوم إلى الغد" ... صج والله!

وايد ناس عندهم مفهوم مشوه عن الأشياء المهمة, يتصورون المهم ضرورة بس متعب ويعل, والغير مهم هوكل شي يونس وحلو لكن دائما مؤجل وفي ذيل القائمة, وعلى ما يوصلون له يكون حاش معظمهم انهيار عصبي! واللي يزيد الطين بلة إذا كانوا من النوع اللي ينشغل باللي ماعنده عن اللي عنده, هذيلي صج محرومين... لامن أرضهم ولا من سماهم... اللي راكب سيارة عادية يجز بالعصاري عالحب ويلتفت على راعي السيارة الكشف اللي يمه ويتحسر على عمره... شتفيد الكشف إذا ما طالع السما وكحل عيونه بلونها ... بهالغيوم اللي لو لونتها الشمس ولا ريشة فنان... نازلة على هالخضرة اللي بالشوارع النظيفة وعلى هالبيوت الآمنة الحلوة ... هالخبلة اللي الله معطيها عيون تحسدهم عليها المها وتحن تبي تروح إيران علشان تصغر خشمها... ما تدري إن خبراء التجميل ما لقوا علاج يعوض عن الثقة بالنفس ولا راح يلاقون؟! ... اللي واقف بالزحمة وما وراه شي بدل ما يرفع التليفون ويسولف مع أحد يحبه ومن زمان ما كلمه أو يسمع قرآن واللي مو مطوع موسيقى, يعصب ويعيش الدور ويبتون ويزيد الزحمة زحمة... هذا إذا ما دعم! ليش؟! عيل لو احنا من هالديار اللي شوارعها "ديد ...ديد" طول الوقت جان صاحبنا استخف وقعد!

العمر اقصر من إحنا نضيعه بمغثة وضيقة خلق... رب العالمين يقول:"كلوا من طيبات ما رزقناكم" ... إذا ربنا يبينا نستانس لا نخلي إبليس يخرب علينا... ما في احد خالي هم... ربنا يقول بخواتيم سورة البقرة:"لا يكلف الله نفساً إلا وسعها" ...فإذا صادفتوا أحد شايل الدنيا على راسه قولوله:"الزين كله تسلم عليك وتقول لك عيش حياتك وعن التفلسف!", واللي مدلع وكاسر خاطر عمره ومسوي نفسه شهيد عصره هم سلمولي عليه وقولوله هالآية الأخيرة وإن يروح يحاول يعدد نعم ربه عليه وايد أحسن له

till the next time we meet n after that n forevermore...

:D and have a nice weekend حافظكم الله حبايبي

Guess Who'z back?

yes me own lovely, wonderful and ... oh, i missed u so much! readerz n readerzaty ... c'est moi اللي هي أنا-الله يخليني لكم يا ربي يالله- is BACK!



this time for real 7abayby إي والله i sware! wa a5eeran i managed 2 get myself a decent internet connection. من اليوم ورايح-بإذن الواحد الأحد- ماكويوم تقرون لي o 3ashra la2. Allahoma itha insha'3lt and had 2 go away 4 a while, in this case ... مشكلتكم!



just kidding :p



elmohim antaw shlonkom? sha5barkom? shlon رمضان مر عليكم?

9imtoh 3asakom wella mithil kil sina? hehehe

الله يتقبله منا ومنكم ويعوده علينا بالصحة والعافية حبايبي

God bless u n big bossa 4 u all *