سؤال بريء....

قواكم الله حبايبي-

:]

شلونكم مع الويك-أند الماراثوني؟

جان زين يسوون الخميس إجازة كل أسبوع وترك... يصير وناسة، مو؟

:p

بس مو هذا سؤالي البريء

-هذا سؤال واحدة مو بس متفائلة إلا عايشة في "دنيا بمبي" على قولة سعاد حسني الله يرحمها

:p

سؤالي البريء يقول...

Why ... O'why?

يا مصممين العالم أنتوا مصرين إنكم تحسسونا إن إحنا متان وعمالقة؟!٠

٠

حق اللي مو شايفني منكم-

أنا طولي ١٥٠ ووزني ... هممم ... أقول ولا ما أقول؟ ... أقول ولا ما أقول؟ ... جنه مو لازم أقول، مو؟...٠

HaHa-

لا يبا بقول ما عندي مشكلة... وزني يا محفوظين السلامة هو ٦٥ كيلو بالتمام والكمال- الله يخليني لأميمتي

-إي والله يا قرائي الأعزاء تعبت و أنا آكل وآكل حتى أوصل لهالوزن

وآخرتها إيي مصمم ولد إبليس في شركة ملابس طايح حظها مثل...

Top Shop...

Zara...

Oysho...

Mango...

H&M...

وغيرهم من الشركات ويقوم أخينا الفذ يسوي قياسات حق ناس أجسامهم جنها أصابيع كتكات

n by KitKat i don't mean KitKat CHUNKY!

:S

يعني الباقيات الصالحات اللي من طقتي وأمتن يروحون ينتحرون أو يشترون فازلين بالجملة من الجمعية ويدخلون عمرهم غصب بالملابس!

يعني حتى توضح لكم الصورة أكثر

me darlingZ...

أنا مرة رحت أدور لي بلوزة واسعة وطويلة... طبعاً ما لقيت شي في محلات البنات، قلت

يمكن ألاقي شي في محلات الرياييل... وعجبتني الفكرة للحظة لأني تذكرت أيامي قبل ما أتحجب... شلون كان

نص كبتي من محلات الرياييل على بو كاجوال... المهم

I went to Top Man

وشفت لكم هذولي البلايز اللي يونسووووووووووووون.... طوال شحلوهم... وكل الألوان اللي تخطر عالبال

يوم ييت أقايس إلا... هَي-هَي ... وَي-وَي

الميديوم ما فاد... اللارج ماني قادرة أتنفس فيه... الأكس لارج بينبط إلا... صكني راسي

يعني اللي متعافي شوي من هالشباب أو المكرش شيسوي بعمره؟؟؟؟؟

حقيقة ... لا عزاء للمتينين

C u next Friday- inshAllah- BaBeZ :*****

بسنا قذارة!

أنا معصبة!0

0

هالموضوع من دهر بخاطري أكتب عنه لأنه مسبب لي أزمة ورافع لي ضغطي!!0

:@

0

0

آسفة فديتكم إني دشيت بالسالفة على طول, من غير إحم ولا دستور ولا حتى سؤال عن أحوالكم-0

اللي إنشالله تكون بخير-0

babeZ بس عذروني

لأني أطفر من وقاحة البعض وأشمئز من إنعدام إحساسهم وأنانيتهم,0

:S

0

0

إستغفر الله يا ربي ...0

كلماتي قاعدة تضيع مني وتسلسل أفكاري قاعد ينقطع لأني قاعدة اتذكر هالناس وسواياهم وأعصب أكثر!!0

0

0

تقفون... نخيلوا معاي هالمشهد...0

اليوم... ويك-إند

الوقت... صبح

الجو... حر ... برد... مو مهم لأن السما صافية أو مزينة بجم سحابة تقولون لوحة فنان-0

سبحان من أبدع وصورها-0

إنت\إنتي ... طالعين من بيوتكم... مسمين بسم الله ... راكبين هالسيارة ومحركين بحفظ الله...0

تسمعون أغنيتكم المفضلة ... المزاج رايق

عصير بإيد ... السكان بالإيد الثانية...0

عيونكم ما تشوف غير شارع مستوي نظيف... سيارات سنعة... بيوت حلوة...زرع ربكم محاوط هذا كله...-0

أمن وأمان... 0

ربنا ولك الحمد ... نعمة ...فضل الرب علينا متجلي في أبدع صوره...0

تتبسمون في لحظة إدراككم هذي... 0

0

0

وفجأة...0

السيارة اللي جدامكم راعيها\راعيتها ينزل الجامة ويقط وصخ بالشارع جنه الشارع شارع أبوهم اللي يابهم!0

0

0

أيا عديمين الحيا والنظر والذوق!0

وكسر إنشالله اللي يكسر رقابكم قبل إيدينكم واللي يقرأ يقول آمين!!0

0

0

يعني إنت يا ولد البيك وأنتي يا بنت الباشا ما تبون الوصخ بسياييركم تقومون تقطونه بالشارع؟!0

إنتوا رحتوا وذلفتوا بستين داهية تاخذكم بس اللي وراكم شذنبهم يبتلشون بهالمنظر لغاية ما إيي البنغالي المسكين ويشيل وصاختكم؟!0

يعني ما تعرفون تخلون الكلنكسة أو جلاص العصير وتنزلونه من السيارة تالي؟!0

طبعاً تعرفون!0

بدليل إنه أول ما تسفطون بجمعية أو سوق تنزلون حمولتكم عالرصيف والزبالة تبعد عنكم خطوتين, مو؟

سوَد الله ويه العدو!0

0

0

إعنبو داركم أنتوا ما تحسون؟ ما تستحون على عمركم؟ ما فيكم خير لديرتكم؟ ما تحفظون الجميل للديرة اللي ضافتكم جانكم زايرين أو مقيمين؟

ولا السالفة "مال عمك لا يهمك"؟

0

0

بس شاطرين تقولون نحب الكويت...0

مالت عليكم وعلى حبكم فوقكم!0

0

0

حب الديرة يالقذر ويالقذرة مو قول إنما هو فعل...0

شلون تقول أنا فدوة لهالأرض الطيبة وأنت عيزان تمشي خطوتين على بو حر؟!0

شلون تتفلسفين عن أهمية إعمار وتطوير البلد وأنتي قاعدة توصخينها؟!0

0

0

يا جماعة أنتوا تشوفونها هينة, بس ترى أكثر النار من مستصغر الشرر...0

الشعوب والأمم شيردها لورا غير كلمات مثل ... شدعوة؟ ... ما كو إلا العافية ... هو! ما صار شي!...0

أو الكلمة اللي ألعن ... "عادي ... الكل يسوي جذي"...0

0

0

حبايبي...0

ما في واحد فينا ما يترنم بأول وأيام أول....0

وشلون أول شي والحين شي ثاني...0

خصوصاً شلون الناس أول أطيب وأسنع وأحسن و...0

0

0

حبايبي...0

فاقد الشيء لا يعطيه...0

رب العالمين مايطق بعصى, لكنه -عز شانه- ما يسدد راي الجذاب...0

ما يوفق الخاين...0

ما يرفع قدر اللي يشوف نفسه عالآخرين...0

ما يحب اللي يقدر يأمر بمعروف ... أو ينهى عن منكر لكن يمتنع على بو الحبيب ماله خلق نجرة!0

إحنا ما فرقنا أول عن الحين مني والطريج...0

ربنا يقول لنا في كتابه:0

"وما اصابتكم من مصيبة فمن أنفسكم"

إذا بنقول عن كل شي "عادي" عمرنا ما راح ينصلح حالنا...0

على يوم بنصبَح على شوارع قذرة جنها شوارع مصر-0

مع إحترامي للمصريين بس صراحة شوارعكم ينضرب فيها المثل بالقذارة وهذي حقيقة مؤسفة أعزيكم عليها-0

وراح نتشرَه عالبلدية.... ويكتبون بالجرايد... ويصير إستجواب "أين عمال التنظيف؟"...0

ونتحسر على ايام اول... ونلوم المجلس البلدي...0

بالوقت اللي لازم نلوم فيه أنفسنا... لأنه كلنا راعي وكلنا مسؤول عن رعيته

0

0

حبايبي ...حافظكم الله...0

وآسفة إني نزلت بوستين جذي ورا بعض وعفست النظام الأسبوعي, 0

أنا مو قصدي أدودهكم... لكن السالفة وما فيها إن الحجي يقرقع بقلبي وما قدرت أرد أصابعي عن طباعة حروفه...0

.... تحروني اليمعة الياية إنشالله

أحبكم

:******

ليش التعذيب؟ ليش؟

حياكم الله

me darlingZ :D

.

.

شلون أسبوعكم لي الحين؟ إنشالله كله تمام وآخر ألسطة على قولة المصريين؟

عاد على طاري المصريين- إحنا بيتنا مجابل المسجد, لأن إحنا إسم الله علينا بيت التقوى

:p

وغرفتي تطل عليه مباشرة

يعني أسمع خطبة اليمعة بوضوح ,وساعات ابطل الدريشة إذا كان صوت الإمام واطي شوي

.

.

the butter...

قبل جم شهر غيروا إمامنا وصار بداله إمام مصري

إحنا صج متعودين على بعض الأئمة- إذا مو كلهم- إنهم الله يهداهم يشتطون زيادة عن اللزوم في خطبتهم على غير معنى

لكن صاحبنا هذا -جعل امه ما تجيب غيره- حطم الرقم القياسي في الصراخ

مو بس بالكويت, وإنما على مستوى الشرق الأوسط

!!!

.

.

لدرجة إنه لما يوطي صوته على بو يبي يضفي تأثير درامي عالكلام - بلا حلى- أحسه جنه قاعد عندي بالدار

وإذا تحمس في خطبته حتى لو أشغل ال

MP3

وأعلي الصوت حده هم اسمعه شيقول

إذا على يوم إنبطت أذوني صدقوني بسبته

.

.

وجان زين يعلي صوته على سنع

يعني لما إنت تتكلم عن رحمة رب العالمين وكرمه سبحانه مع عباده

أو جمال أخلاق الرسول- صلى الله عليه وسلم

ليش تصارخ من قمة راسك وتكون في قمة التشنج والأعصاب؟؟؟؟؟

.

.

عمى بعين إبليس وأهله! ... هذولي اللي غصب يبون يكرهون الناس بالدين والروحة للمساجد ومو عارفين

والله انا ما اشفق إلا على هالفقارى المساكين اللي يدورون الأجر من رب العالمين ويحضرون خطبته

.

.

ومنا إلى وزارة الأوقاف:

يا يبا سنعوا أئمتكم ورحموا الناس, الله يرحمكم ووالديكم

في النهاية نحن بأمس الحاجة لمن يكون قدوة للأجيال الصاعدة

قدوة في الوسطية والسماحة والإعتدال

.

.

ومني لكم:

هالمسج الحلوة وصلتني من رفيجتي "عواشة" الله يجمعنا وحبيبينا عالخير دوم...

"ما أروع أن تحب أناساً يجبرونك أن تشتاق إليهم,,,

ويجبرك القلب أن تدعو لهم بظهر الغيب...

أضاء (النور) قلوبكم

وغفر (الغفور) ذنوبكم

وأزاح (القادر) همومكم

وأصلح (الهادي) أموركم

وسدد (الحكيم) آراءكم

وأجاب (المجيب) دعاءكم

وبارك (الكريم) أعمالكم"

.

حافظكم الله حبايبي

untill next Friday XOXO

TGI Friday!

Hi there Num-NumZ!

missed me?

:D

أدري ... أدري

طولت عليكم حبايبي بس كنت بلوية شوية

and NOOOOO

ما تزوجت- ولله الحمد

لكن كل ما في السالفة إني كنت ماخذة إجازة من كل شي

علشان أقدر أرتب أموري وأعيد حساباتي براحتي

عاد اللي يقرا الحين يقول: إسكت! البنت لقت لها حل لقضية فلسطين ورجعت لنا

أما أنا فأقدر أقول لكم وبالفم المليان

Hell No!

:p

حياتي الحين لوية أكثر من أي وقت ثاني

لكنني تعلمت وايد أشياء بالفترة اللي طافت, من أهمها إنه

لو الإنسان شايل شي وقام قطه في كل مرة يتعب فيها من الحمل, على بو بيرجع يشيله مرة ثانية عقب مايرتاح

راح يرد ويمكن يلاقيه على حطته أو يلاقي الطيور طارت بأرزاقها

أو ألعن... ممكن يكون إرتاح وايد لدرجة إنه الحين ما يقدر يشيل نفس الحمل مرة ثانية

عاد أنا كنت على وشك إني أسوي جذي وأسحب عليكم سحبة من النوع الزين

وآخذ لي تقاعد مبكر من التدوين والمدونات والمدونين بعد

بس قلبي ما طاوعني... وبعدين ما أقدر على فرقاكم

حدي ولهانة على كل اللي تعرفت عليهم هني

وناطرة الباقيات الصالحات اللي- إنشالله- بتشرف بمعرفتهم تالي

:D

أنا إخترت يوم الجمعة علشان أرد فيه لأنه يقولون

ليلة الجمعة كل الشياطين مجتمعة

فأنا حبيت إني أوافيكم بآخر ما توصلنا له بالإجتماع

;p~~

نشوفكم على خير اليمعة الياية إنشالله

Big Bosa 4 u ALL :*

خبر حلو ... خبر مو حلو

Hellooooo me dear readerZ n readerZat :D

عندي لكم خبر حلو وخبر مو حلو, أيهو تبوني أقول لكم إياه أول؟

مع إن رايكم ما راح يفرق وايد لأن البوست إنكتب وخلص

في الواقع أهو ما راح يفرق بالمرة, بس يعني ... من باب الذرابة عشتو

هيهي

anyway...

الله يبعد الشر عنكم حبايبي الخبر المو-زين يقول إن

الزين كله

اللي هي أنا-الله يخليني لأهلي ياربي يالله- بتتوقف عن التدوين حتى إشعار آخر

now before u cry n before u make ...

فيلم هندي او تفتحون لي مجلس تأبين-إسم الله علي ... لي طولة العمر إنشالله... مع إني بيني وبينكم أشكك خصوصاً إذا أخذنا بعين الإعتبار طريقة سياقتي

أبيكم تعرفون إن توقفي هذا مؤقت

... أكرر

مؤقت

ومو وايد ... يعني يادوب ... جم أسبوع على جم شهر

تقدرون تقولون جذي ... على السنة اياية إنشالله

uh ... uh ... UUUUH!

قبل لا يشطح خيالكم لبعيد أنا ما راح أتزوج-الله يجيرنا

كل ما في الموضوع إن أبي شوية وقت لنفسي أرتب فيه أموري, لأن من اشتغلت الصيف اللي طاف-عسى الله يبلغكم بحبيبينكم- وأنا يومي معتفس وإنجازي معدوم, والإنترنت ياخذ من وقت البني-آدم من دون مايحس, بالذات إذا كنت بكتب لكم بوستات جنها جرايد من طولها, والإختصار في الكتابة خيار-بالفتحة على ال خ يعني إختيار مو خيار اللي ناكله-غير وارد

لأني أموووووووووووووت بالسوالف ومتى ما بطلت حلجي ما أعرف أسكره, حتى وأنا نايمة

إختي-الله لا يفرجنا ولا يفرجكم عن غالي- تقول إني أنام وحلجي مبطل

الظاهر أكون حلمانة إني سمجة... بس الله يهديني السمج يسكر حلجه عقب مدة مادري ليش أنا أتم مشرعته؟

ونفس الكلام ينطبق على الأكل ... عاد ماني همجية أخلي الناس تشوف اللقمة وهي تحوس داخل حلجي... أقصد إني آكل وايد

إي يحليلي... آفة صغيرة-ماشالله

فمن هالمنطلق

ولأن أهلي صايرين ما يشوفوني, وطلعاتي مع ربعي يا إما قحط يا إما تهيهي مرة واحدة من مكان لي مكان, ودوامي زين ما يفصلوني منه, وتشوفوني باجر واقفة عند الإشارة ... صوب شارع دمشق أول ما تدشون جنوب السرة

مسوية نفس هالعيايز

أو تلاقوني عند عصير الضاحية ومغيرة اللافتة من

... حق

!شرط أكتب يوعاااانة ... أبي قبوط

لوووووووووول

هذا غير إن

مشاريعي وطموحاتي برة الدوام مو قاعدة أشتغل عليها, وهواياتي مو قاعدة أمارسها, ولأن الإنسان ما يقدر يغير حياته بين يوم وليلة

وتبني عادات جديدة يستلزم وقت

إخترت إني أسوي

لمدونتي شوية

أوكي ... واااايد مو شوي

لأن إحنا ماشالله

already

على أعتاب إبريل, بعدين قابل علينا الصيف ولويته, وعقب رمضان ومادري شنو

فالسالفة مطولة شوي

أما الخبر الحلو يا حلويييييييين

عسى ربي يحلي لكم دنياكم وآخرتكم... قولوا آميييييييين

فهو إن إسم الله حولها وحواليها-أنا- بتم أتحفكم بطلتي البهية, وأسير عليكم من وقت للثاني وأذيكم بتعليقاتي

i know

حبايبي إن حبي قاتل-حبكم ربي- لكن ما يحتاج تكلفون على نفسكم وتطلون على مدونتي كل شويتين تجيكون إذا أنا رديت اكتب أو لأ, لأني بس أرجع أنزل بوستات بدز لكم إياها إيميل

مهي ببشرى ,مو؟

لوووووول

ديروا بالكم على بعض يا عيال ومو تصيرون وكيحين

حافظكم الله حبايبي

و

big bosa 4 u all *

سؤال غير بريء

قواكم الله حبايبي :D
شلونكم مع دواماتكم وحياتكم؟ عسى مرتاحين إنشالله؟
المتعسر فيكم عسى الله يهون عليه, واللي أموره متيسرة ... مصيبة! ...أأأأ ... أقصد عسى دوم
هيهي ... جكيتك! خليتك تضحك حتى وإنت زعلان... ما ضحكت؟! ... ويه يا ملقك
****بس ما عليه... قارئي وأحبك حالك حال إخوانك وخواتك القراء

والحين عمري إنت وياها منو فيكم ما شاف
خالتي قماشة؟

تدرون ليش اسألكم؟ ... لأن يا محفوظين السلامة ما أعتقد خافي عليكم الحيلة القديمة-الجديدة اللي الحكومة قاعدة تمارسها معانا بالتعاون مع مجلسنا الموقر-عسى الله لا يحرم الأثنين منا

فهم دأبوا على إلهائنا-ولسنوات طوال- بوهم إسمه "الصراع السياسي بين السلطتين", بالوقت الذي لا فيه صراع ولا هم يحزنون, بل العكس... تعاون تام بين الإثنين للسيطرة على النمو الفكري لشعب باكمله, وتوجيهه للإعتقاد بما ترتإيه الحكومة

...للي توه ماكل فول ومو فاهم شنو العلاقة ما بين "خالتي قماشة" وحكومتنا الرشيدة, أقول له الآتي

قارئي العزيز يا اللي أنا مفترضة إنك كويتي... من كثر ما إنه حبك قاتل وحكومتك ميتة عليك, فهي مثل أم من كثر ما تحب عيالها صارت تبي تمتلكهم ومو قادرة تتقبل إنهم في يوم من الأيام بيكبرون ويتركونها علشان يعيشون حياتهم الخاصة, وهالأم مثلتها "حياة الفهد" بصورة ولا أروع على الشاشة الفضية, ولكن حكومتك-الله يخليك لها- طبقتها بالواقع, ولأن حكومتك عاينتك وخابزتك وتعرف الإنفتاح الفكري عندك, فهي-أي حكومتك- وعلية عليها خايفة إنك في يوم من الأيام يطق براسك وتقرر إستغنائك عنها بتهميش دورها مثل دولة

Big Ben

!أو أسوأ ... تتحد مع إخوانك وخواتك الكويتيين لتغيير نظام الحكم فتتحول كويتنا الحبيبة من إمارة إلى جمهورية

فحكومتك الرشيدة لأنها رشيدة قعدت تمخمخها ... أنا شلون أخلي الشعب على طول تحت جناحي وأحرص على إنه ما يستغني عني؟؟؟؟؟

Eureka!!

أنا أزهدهم بالسياسة وأهلها وأخليهم يعافونها مولية عن طريق أفلام مالها أول من آخر لسجالات بين السلطتين, أسمح فيها لكل زوير وعوير... ومنكسر ومابراسه خير الوصول لكرسي البرلمان وأتطمش عليهم يتهاوشون, ويناجروني على خفيف من وقت للثاني, عقب إذا حمى الوطيس أصير أفصل الكهربا عن الفيلم وأحل المجلس, من بعدها أعيد الشريط من أول مع بعض الوجوه الجديدة, فيفقد المواطن ثقته بممثلينه ولا تعود لهم مصداقية عنده, وأتم أنا بروحي اللي أشق وأخيط بالديرة ... بالطول وبالعرض

أدري قارئي العزيز إنك تعرف هذا كله ... لكن السؤال الوجيه اللي يطرح نفسه هني ... لي متى بنسكت على هالوضع المزري؟

وسؤال آخر ينم عن لقافة... يا ترى حكومتنا-الله يخلينا لها- عندها فكرة إن الناس بدت تشكك بمصداقيتهم بعد؟

:p أدري إني بمقالي هذا ضمنت لي زيارة لمقر "أمن الدولة" الكائن في جنوب السرة ...بس أشوه! يم بيتنا

****حافظكم الله حبايبي وعسى الله يحفظ ديرتنا من كل شر

أحسن الله عزاكم

Hello there me darlingZ :D
لا تخترعون حياتي ... ما في عزا-الله يحفظ لكم حبيبينكم من كل شر يا ربي يالله
لكن السالفة وما فيها إني أبي اتحلطم كعادتي دائماً ... هيهي
وأزف من خلال مدونتي هالأوادم المو سنع اللي رافعين لي ضغطي
إي والله...
أزمة اللهم يا كافي
!مسببين لي أزمة

سؤالي لقارئتي العزيزة... تخيلي معاي عمري-بعيد الشر عنكم- إن توفى من عندكم شخص قريب
وأنتي فديتج قاعدة بالعزا تبجين هالغالي اللي راح وعويناتج-بعد عمري عليج- صار حجمهم الدبل من كثر ما هم مورمين من البجي
أوتصوري معاي إنج سرحانة بذكرياتج عن هالحبيبة اللي إنتقلت لجوار ربها وويهج يا قلبي صاير ليمونة ومنقلب كركم من قلة النوم والأكل بسبة حزنج
تخيلي-إسم الله عليج- أنتي بهالحالة اللي ما يعلم فيها إلا رب العالمين
وتهل عليج هالمكحلة ... مو بواقي كحل ... لأ
مكحلة

خطة كحل من هناااا لي هناااا
يكون تبي توجبج وتعزيج
أوتخيلي تواسيج واحدة لاطخة لج الويه بالفاونديشن والبودر-يعني عشتو
Natural look
وعويناتها تتلاقط جنها قطوة من العدسات الملونة
أو تنمد لج إيد تبي تسلم عليج, والأظافر توهم
Fresh
مصبغين بالصالون
تطالعين الويه لكن يقطع عليج تركيزج ال
Puff
اللي مسويته بشعرها لكنها مع هذا ما قصرت... عفسته لج من ورا وربطته أي شي على بو مقدرة إنها رايحة عزا
تخيلتي كل هذا حبيبتي؟
قولي لي الحين ... شنو يكون شعورج؟

...قبل فترة رحت أعزي واحدة من رفيجاتي بوفاة يدتها
دخلت... سلمت على أهل العزا وعزيتهم كلهم ... دورت لي على مكان فاضي أقعد فيه
طبعاً ما يحتاي أقول ... الأوادم تهذر وتسولف جنهم بتسيورة مو عزا
قلت آخذ لي جزء أقراه على روح المرة وايد أبرك لي... شوي... ولا تيي تسطر يمي واحدة
أنا لا شعورياً إلتفت عليها وبعدين رديت كملت قراءة
حبايبي... تعرفون لما تشوفون شي وتوخرون ويهكم عنه بعدين تستوعبون إنكم شفتوا شي المفروض ما ينشاف, يقوم ويهكم غصبٍ عنه يلف مرة ثانية بإتجاه اللي شافه بسرعة شوي وتكسر رقبتكم؟
يوم الإخت سطرت يمي وإلتفت عليها شفت سيقان
إي والله سيقان... بس أنا-الله يخلف علي- ما إستوعبت
يوم درت ويهي عنها جان تكفخ الصورة بمخي
إلتفت عليها مرة ثانية وأنا مو مصدقة... هو!... كاااااااا... سيقان مسفطين... وكل واحدة فيهم شوي وتصير طولي تبارك الله
...هديت القرآن اللي بيدي وقعدت أتمقل فيها
إلا الإخت "شقراء ولكن" معفسة الشعر جنها واحدة وراها طباخ أو غسيل
مو معترفة بشي إسمه شيلة لكنها وللأمانة لابسة ذيك العباية الكويتية المقطوطة عالجتف
واللي صراحة مادري شالحكمة منها, لأنها مخليتها مبطلة
وتحتها توب مادري شلون قايل ... ما ركزت فيه
وتحت تنورة قصيرة قطن أم كشاكش مالت بحر, عرفتوها؟
!!والله العظيم
ونعال زنوبة-وأنتوا بالكرامة- هم ملوت بحر وأصابع ريولها-إسم الله عليها- جنهم بلح الشام من كثر ماهم حلوين
ومصبغتهم بلون السنة-بذاك الوقت
Coral
اللي هو يكون
Orange 3ala pinkish
نفس لون الشعاب المرجانية

لأ ...يعني صويحبتي هذي توها ياية من الشاليه؟... بتروح الشاليه؟
... مادري صراحة
أنا إحترت فيها وين كانت ووين بتروح
بس مؤكد إن مو عزا

يعني قلنا إن اللي تبي ترزز عمرها وتتزوج تروح عروس وتعزي-حتى لو أوادم ما تعرفهم
وتكشخ وتاخذ أمها وياها الصالحية أو الراية-مو رفيجاتها
لازم الأم ... علشان تبين كأن الأم اللي يارتها معاها
لأنها إذا طلعت مع رفيجاتها تبين أشكره إنها قاعدة تجز
عرفتوا شلون؟
يعني آمنا بالله ... ورضينا بهذا كله
!!لكن عيب ... والله العظيم عيييييييييييييييييب
راعوا مشاعر الناس ... حسوا فيهم
ترى الإحساس نعمة
طيح الله حظ إبليس أكثر مما هو طايح ... صج قلة سنع

نصيحة لكل من عنده قطو

لا تحكر قطوك بزاوية لأن مرده بيطمر عليك ويشمخك

لو شنو كنت بالنسبة له ... مهما كان يعزك

مثل قطعة لحم عردة راح يتفلك

يعني صراحة بتكون بالمرة مو في وعيك

إن تصورت إن كل مرة تدوس فيها على ذيله بيبتعد شوي ومن عقب يرجعلك

طيعني أحسن لك

خذها من قطو عاف خناقه وخلها حلقة بإذنك

وإذا إنت قطو ومثلي لايعة جبدك

عطه كلمتين بالعظم وسم له بدنه شوي مثل ما سمِك

وعلى هالطاري ... إسمح لي اقول كلمتين حق اللي في بالي مو حقك

...خناقي

عطيتك ويه بما فيه الكفاية ويا ويهك

!وخر عني

ترى حدي مالي خلقك

مليت وانت تعوبل فيني منت عارف شلون تلفني حوالين صبعك

عاد روحك ذيب

!هيهي... والله مصدق عمرك

اللي أشطر منك ما قدروا علي... إنت بتقدر ويا خبثك؟

إنت مو قادر تفهم إن أقصر طريج لي هو سيدا

لأنك كل ما تلف و تدور بكون عنك بعيدة

...معاي الكلمة اللي تستحي منها بدها

قول اللي بقلبك

...قول لي شقاعد تفكر فيه شما يكون

أبي أسكن عقلك

...قلت لك من قبل أنا مو مثل الباجي

عيزت أفهمك

كل اللي أبيه من دنيتي آدمي أقول له أحبك

وإذا الله جمعنا مع بعض بالحلال فهذي نعمة من ربك

...صراحة

بالمرة ما هقيتها منك

يعني أنا الشره علي إني إنعجبت بشخصك؟

...أنا اللي أستاهل أكثر على بو إني بطيتها أشكره وقلت لك

في إحتمال وارد إن اللي بينا أكثر من صداقة تعال نستكشف؟

!أثريك طول هالمدة كنت حاطني في بالك وعلي تستشرف؟

وأنا أقول الريال شفيه ما صدق خبر؟

قاط عمره جذيه ولا هجوم التتر

شوي ... شوي

لا يطق عرقك

!لا يكون على بالك إني ميتة عليك وبفحط علشان أضبطك؟

وعليه عليك! ... لا يبا قوووم ... إصحى من حلمك

ما همني وين بيتكم ... منو جاركم ...شسم أهلك

مابي أعرف جم بحسابك وشنو تملك

وحده ما يثيرني البريستيج اللي إيي مع شغلك

طويل ... قصير ... أبيض ... أسمر ... أياً كان شكلك

كل شي ولا إنك تهين كرامتي... ما أسمح لك

أنا بشر... فكر ... شعور

ماني لعبة عندك

أنا كيان مستقل بذاته

ما أمشي بأمرك

أنا مو قاهرني غير إني نزلت نفسي لمستوى واحد مثلك

أنا مو متحسفة إلا على خصوصياتي اللي فيها شاركتك

صج إن ماكو منها شي جايد

صج إني أصلاً ما عندي شي أخشه أوأخاف عليه وايد

بس ... مادري ... الفكرة

أو بمعنى أصح ... الوهم اللي صدقته يوم خليتني أحس إني واحدة من ربعك

كنت مغرورة يوم عرفتك

إذا مشيت عالقار أقول له من قدك؟

...من صجي

كنت مؤمنة إن عندي حصانة من اللي مثلك

كنت غبية يوم إخترتك

يوم جعمت عقلي وهو يحذرني منك

من البداية حسيت فيك إنك مو تمام

بس ما كان عندي المعلومات الكافية إني أقيمك

حقيقة شيسمونك... مادري شنهي مشكلتك

هالفضاوة اللي بقلبك مادري من وين يتلك

إنت أناني ما تهتم إلا لنفسك

!متى ما فضيت لي تييني تبيني أدلعك؟

baby ...

أنا مو أمك

وما أعتقد إن دمي ثقيل أو سوالفي بايخة علشان كل ما تكلمت تغير لي الموضوع

!خو ما يصير بس أسِمعِك

...وعلى فكرة

كل كلمة ونقزة قطيتها لا تحسب إني من وراها ما فهمت قصدك

كل حركة وصخة سويتها لا يكون في بالك إني ما فهمتك

لكني بمزاجي طوفت لك

ناطرة أشوف وينهي آخرتك

بس كل مالك وتمصخها

والغريبة إن كلمة آسف ما تطلع من حلجك

طبعاً

!إنت معصوم حالك حال عليه الصلاة والسلام نبيك

بس انا شكو؟

أنا مسحتك من حياتي وافتكيت من همك

أحمد ربي وأشكر فضله إني لحقت على عمري وكشفتك

البني ترس الديرة ... شوف لك منهم واحدة عديمة الشخصية... كفوك

روح-لا فديتك ... روح باللي ما يحفظك

ما يازلك الحجي؟

الطوف ترس الديرة ... شوف لك منهم واحدة قوية ...تعجبك

أما إنت يا قلبي فلا تزعل ولا يهمك

لك رب إسمه الكريم يمسح عليك ويعوضك

وفي النهاية كل طراق يحوشك ... يعلمك

بس بسولف

قواكم الله حبايبي :D

شلونكم؟ شخباركم؟

مادري ... ترى ما عندي سالفة.بس حبيت أكتب بوست جذي ... عام

لأن مالي خلق أنزل الصور والفيديوات-جمع فيديو- اللي عندي, ولا لي خلق إني أشتغل على الجم درافت اللي عندي بعد, وبالعربي جذي ... مالي خلق عمري ونفسيتي ما يعلم فيها إلا رب العالمين ... هيهي ... إي والله ...شر البلية ما يضحك

!يا فرحتي بعمري

وعلى فكرة... ترى أنا وايد

sorry

يعني إذا كنت قاطعة شوية معاكم وما أزور مدوناتكم الحلوة, فهذا لأني بالغصب قاعدة أحاول أجمع شقاعد يصير معاي بحياتي, ومخي ما عاد فيه طاقة يستوعب علشان يفهم أنتوا شقاعدين تكتبون

وإذا كنت مو قاعدة أكتب لكم كل شويتين في مدونتي فهذا لأن ما ودي إني أنكد عليكم

عاد لا ينكسر خاطركم علي وتقعد تدمع عيونكم وتخلصون علينا الكلينكس ويرتفع سعره بالجمعيات

أفا عليكم! أنا أفروديت

:p

فمو تحاتوني ... انا قدها وقدود, والنكد ما ييب إلا نكد

sooooooooo ...

...خلوني أسولف لكم أحسن

بس لحظة! قبل لا أنسى... حبيت إني أتشكر منكم حبايبي على المعلومات القيمة اللي عطيتوني إياها بخصوص تضبيط مدونتي, لكني قررت تأجيل هالموضوع مو لأنه ما عجبتني مصادركم-حشى والله!- لكن كل ما في الموضوع إني ما لقيت الشي اللي حسيته ياي تفصال على شكل المدونة اللي في بالي

أدري إني طرار ويتشرط بس ما عليه ... أمون :p

!فخلوني أتفرغ على هالمدونة جذي وأضبطها براحتي في يوم من الأيام ... عاد انتوا لا تتريون اي نتايج إلا على الألفية الثالثة

المهم... أسولف لكم على شنو؟ ... على شنو يالزين؟ ... إيييييييييييييي

خلوني أقول لكم على سالفة كنت كاتبتها بمدونتي السابقة قبل لا

أتليقف

سلمكم الله كان ياما كان في قديم الزمان-مو قديم وايد قبل حوالي 13 سنة- إختي الحنون سألتني ... تبين كوكيز؟

فديتها! كانت تبي تبرني وتشتري لي نوع الحلو المفضل عندي, طبعاً هذا معناته رحلة ميدانية لهارديز اللي يم سبارو... عرفتوه؟ اللي الحين مقابل الفنار

hmmm ... i think :s

anyway...

سفطت إختي برة هارديز وقالت لي جم كوكيز تبين؟

قلت لها كيفج... واحدة ... ثنتين... ثلاث... أربع ... خمس

هيهي ... آفة يحليلي من صغري-ألف لا إله إلا الله

and now 4 ur information 7abayby

أنا نموي واقف من المتوسط ... طبعاً أنا ما إكتشفت هالواقع المرير إلا يوم دشيت الجامعة, وقلت اقول لكم علشان يكون عندكم تصور عن طولي الفارع :p

دشيت هارديز وطلبت لي المليون كوكيزة اللي كنت أدري إني بخلصهم قبل لا نوصل البيت

إلتفت وراي وشفت إختي ناطرتني بالفولفو ... إبتسمت لطيبتها وحنانها اللي هي غامرتني فيهم

لفيت ويهي ووقفت أسعبل على صور الأكل... شوي ولا يعطوني طلبي

لفيت جسمي على بو بتيسر وأروح بيتنا ولا فجأة ... دن دن دااااا

!!!!كل شي جدامي برتقالي

برتقااااااااااااااالي

برتقالي اللي يعمي العيون ... مو اي برتقالي

إنصدمت... بعدين وقفت أفكر... ها! وين الكراسي؟ ...وين السيايير اللي تنشاف من الدرايش اللي داير مداير المحل ... وحسرتي!! وين إختي؟

لاحظوا إن هذا كله وأنا واقفة مكاني وماسكة جيسة الكوكيز بإيدي وسرحانة أفكر في هالفضاء البرتقالي الشاسع

شوي شوي بدت عيوني تتعود على اللون الصارخ, ولا مثل بصيص النور في الظلام الدامس ... شفت خط أبيض يمر في عالم البرتقال

... جان أستوعب

!هذي بلوزة واحد

هيهي ...قلت لكم ... دقمة

love you all ***

إهداء إلى كل قطو

يقولون القطو يحب خناقه
زين وأنا دموعي شذنبها إن تسلط عليها واحد مافي قلبه ذرة شفاقه؟
أنا وخناقي ننياز ... بس عقلي شسوى علشان يتعذب بعناده؟
رمشي ذبل من طول سهره وسهاده
طيب أحد يقول لي ... شنو جريمة قلبي اللي خلته يطبق عليه أقسى أنواع عقابه؟
أحد يجاوبني... شلون اللي طول عمره جبل ما يهزه ريح تلعب بحسبته سحابة؟
لكن الله كريم ... الأمل مفتاح الصبر والفرج بابه

...راح نتذكر

مو من طبعي النقل ...أحب إن كتاباتي تكون نابعة مني

لكن اللي قريته

هزني

لووووووووووووووووووووووووووووووول!!!

كالعادة حبايبي

الزين كله-اللي هي انا الله يخليني لكم ولأهلي ياربي يالله

...طلعت لكم بإبداع غير نمونة تفوقت على نفسي فيه صراحة

إبداعي هذا يتمثل في إن بوستي اليديد

كلللللللللللووووووش

صار بقدرة قادر تحت البوست الأقدم منه

إعادة تحديد هوية

ولأني مادري شلون أرقع هالخلل الفني-وبيني وبينكم مالي خلق

قررت أخلي سيفوه على خلاجينه, وأنتوا عاد قرائي الأحبة تعنوا شوية ولا تصيرون عيازين, ونزلوا شوية بالصفحة

أو دوسوا على اللنك آنفة الذكر وفكوا أعماركم-الله لا يعذبنا

وبما إن إرتفعت الأصوات بالمعارضة على التوزيع العشوائي للبوسات

فقررت أختم ب

عيدي يا كويت

وتفضلوا بقبول فائق الشكر والإحترام

.... همممم

براطمي تحكني ... ما أقدر

big bossa 4 u all*

ملاحظة: كل الشكر لأخونا العزيز اللي فطني ونبهني

BuJacobe! many thnx 2 u bo :)

إعادة تحديد هوية

السلام عليكم ورحمة الله وبركاته أحبتي في الله

إي مو هذا اللي لقطته من خطبة اليمعة اللي طافت, أما خطبة اليوم فصراحة ما لقطت منها شي, لأني كنت مشغولة بكتابة إيميل مهم إكتشفت إني دزيته للشخص المعني أربع مرات! ... إي والله

...بس مو هذا موضوعنا

سلمكم الله وسلمني وياكم من الشر أنا لما قررت أنضم لعالم التدوين قبل ما أدري شكثر, بغيت مدونتي تكون مساحة صغيرة لي في فضاء الإنترنت الرحب, أوصل من خلاله صوتي لكل من عنده إستعداد يسمع ... كنت وقتها-ولا أزال-أبي مدونتي تكون دعوة للتفاؤل والفرح وتقدير ما نملك بدل الهوس بما لا نملك, والإحساس بقيمة النعمة قبل زوالها... نتمتع بكل ما حولنا وإنبهارنا بكل شي وأي شي مهما كان بسيط أو حسيناه طفولي ... الطفولة ما فيها شي, والناس كلهم أطفال بطريقة أو أخرى, مو إحنا عيال أهلنا؟ خلاص ... عيل كلنا أطفال... كا أنا ... شحلوي ... شزيني وأنا طفلة عمرها خمسة وعشرين سنة

لكن لسبب ما أحس نفسي شوي شطيت عن هدفي, أنتوا يمكن تشوفون إن مافي مشاكل, لكن صدقوني مدونتي اللي قاعدة أقراها الحين غير عن مدونتي اللي في بالي, حتى الألوان تختلف! ... زين والحل؟

هاااااااا ... خبركم بما إن أنا إهي أنا-الله يخليني لأهلي- ما رضيت إن الوضع يستمر على ما هو عليه, فقعدت مع نفسي شوية-ما قعدت صج خو أنا ونفسي واحد شلون يعني نقعد مع بعض؟! ماني مينونة أنا! وإن كان عندي كرت أحمر بس هذا مال الجامعة مو الطب النفسي!!

المهم... قعدتنا أنا وعمري تمخضت عن إكتشافات ثورية, ستقوم بتغيير عالم التدوين إلى أبد الآبدين

إكتشفت أن رغم جرأتي وثقتي في نفسي اللي انا مشهورة فيهم وأعتز فيهم وايد, وتفكيري إن أنا-عشتو- ما يهمني نظرة الآخرين لي... إكتشفت إني ما أحب أتكلم جد والسبب إني مابي أملقها, ومابي إن الناس اللي تتعامل معاي تحس إني مليقة

يعني أنا وصلت إلى مرحلة من كبت عقليتي وتوجهاتي لدرجة أحس معاها إن مخي جيَم ... والله جد ما أتغشمر

صرت أصلاً ما أعرف أقول كلمتين على بعض مثل العالم والناس, ناهيكم عن إن معلوماتي بأي موضوع مفيد يخص ديرتي ما أعرف عنه شي, وكل هذا لأني قاعدة أتصرف بعكس قناعاتي

يعني أنا والله إستحيت من عمري ذاك اليوم... قاعدة أكتب خرابيط بخرابيط بالوقت اللي الدنيا قايمة فيها على سالفة التجنيس-اللي لي يومكم ماني عارفة شنو قصته بالضبط لأن حضرتي ما كلفت خاطري أسوي بحث على الإنترنت بأرشيفات الجرايد

لا وأزيدكم من الشعر بيوت مو بس بيت... في نقاش مع زميل وأخ عزيز وقارئ لمدونتي, ما صدق إن هذي كتاباتي ولامني ليش ما أتناول مواضيع تهم البلد بنفس الأسلوب اللي تناقشت فيه معاه

مسيكين ... ما ينلام ... الله يلوم من يلومه

أنا نفسي بديت أشك بعمري إني صرت مثل د. جيكل ومستر هايد

يعني أهو شي زين إن الواحد يكون غشمرجي ويبي يستانس ويقضي وقت حلو, لكن الشي إذا زاد عن حده ينقلب ضده

أرجو إن ما ينفهم من كلامي إني قاعدة أقلل من قيمة كتابات العديد من الأشخاص اللي يتناولون فيها مواضيع بعيدة عن الساحة السياسية, لكن أنا قاعدة أتحلطم على عمري شلون إن أنا أهدافي للمدونة في وادي وأنا في وادي ثاني ... يا خلاَف

فعلشان جذي عمر إنت وياه وعمري أنتي وياها, قررت إني أبوح لكم بسر من أسرار الكون... ألا وهو ... شسالفة

ezain kilah?

الله يخلي لكم حبيبينكم أنا أصغر أربع بنات... بصغري دايماً خواتي يطفروني ويعيبون علي-طبعاً على غشمرة- فأنا أرد وأطفرهم بأني أمدح بنفسي وأدلع عمري وأطالع روحي بالمنظرة وأتحلى على شكلي, وآخر شي كلنا نقعد نفطس من الضحك, وإذا الوالدة-الله يعطيها طولة العمر والصحة والعافية- زفتني وقالت لي شي مثل "الله ياخذج!", أشهق يعني يكون مخترعة وأقول لها إسم الله علي! إحنا كلنا الله بياخذنا بيوم من الأيام ليش مستعجلة؟ وأخليها تضحك, وعلى هالحال لغاية ما عيال إختي قاموا يقلدوني... خربتهم مساكين... هيهي

فيوم إكتشفت التكنولوجيا وقمت أدش الإنترنت, حطيت لي أكثر من إيميل ونك يعبر عني, لكن صراحة ما حسيت إن أي واحد منهم يعبر عني مثل هذا, خصوصاَ وإني بشكل عام واحدة ثقة وعايشة الدور إني إمرأة من القرن الواحد والعشرين

وهذي يا محفوظين السلامة سالفتي

بس قبل لا تتيسرون وتكتبون لي تعليقاتكم الحلوة, أبيكم ما عليكم أمر تعطوني دروس خصوصية عن كيفية تضبيط شكل مدونتي, لأني بالتكنولوجيا حدي

no english

شفتوا هاللون السماوي الحلو اللي كاتبه فيه نكي, هذا لوني المفضل وبالمرة ما يتناسب مع باقي ألوان المدونة اللي تذكرني بمرقة القرع, وأنا كلش ما أحب القرع... مامتي-الله يخليها لي- تحبه... وأنا أحب مامتي بس ما أحب القرع

هذا إيميلي

fantooger@yahoo.com

طرشوا لي عليه شلون تسوون الأشياء اللي تسوونها في مدوناتكم الحلوة يا حلوين

ورجاءً ما نبي قلة حيا ... ولا تدرون شلون؟ نبي قلة حيا, من غير شي ماراح أحتفل بفالنتين هالسنة

عاد اللي يقرا يقول إني قاعدة أحتفل فيه كل سنة

لوووووووووووووول

لا يبا أتغشمر معاكم, وما يحتاج إني أقول أنتوا كلكم أشخاص قمة في الإحترام والأخلاق في التعامل وما شفت منكم إلا كل خير, وما تدرون أنا شكثر أشوف نفسي محظوظة فيكم

بوسة كبيرة لكل واحد فيكم *

!كلللللللللللللللللللللللللللللللللللللللللللللللللللللللللللللللللللللللللللللللووووووووش

يالله من فضلك! ... ما بغوا يقرون هالزيادة؟

يتراوالي لو مو زايدينا جان طلع لنا مرض نفسي يديد بس عند ابناء الشعب الكويتي

إسمه ... زيادة-فرينيا

تتمثل أعراضه في تغير مفاجئ بضربات القلب, وإرتفاع ضغط الدم, مصحوبة بحالة هستيريا لدى الأشخاص سريعي الإنفعال وإكتئاب حاد لدى الأشخاص الأكثر هدوءً, تحدث لهم مرة كل شهر بالتزامن مع نزول المعاشات!

...لا حول ولا قوة إلا بالله

إحنا في ديرة إقتصادها ماشي عالبركة

معاشاتنا على اي اساس؟

زياداتنا على اي اساس؟

!النظرة لهالزيادة على انها الحل السحري لإرتفاع الأسعار جاء على اي أساس؟

إرتفاع الأسعار نتيجة طبيعية للنمو الإقتصادي لأي دولة طبيعية , طالما إنه في الحدود الطبيعية

بس بما إن هذي الكويت-صل على النبي

فالنظريات الإقتصادية ما تنطبق علينا

عايشين في ظل دولة جميع إحتياجتنا الأساسية فيها مدعومة, من ماء وكهرباء وغيره

!ونحصل عليهم بتراب الفلوس-هذا إذا دفعنا

وفوق هذا كله إقتصادنا شايل من قاموسه كلمة ضرايب

وإحنا نقول ... إي شعليه؟ الخير وايد وعسى الله يديم علينا نعيمه

ما قلنا شي ... الخير وايد ولله الحمد, وعسى الله لا يغير علينا إلا للأحسن, بس الدنيا اخذ وعطا, مثل ما الإنسان ياخذ لازم في المقابل إنه يعطي- ولو القليل- حتى تستمر الحياة وتتطور, لأنه إذا تم ياخذ ويستنزف كل ما عنده, الحياة بتستمر فيه إلى أجل مسمى ولكن بتدهور الوضع إلى ان يقعد عالبساط الأحمدي!!

يقولون ... على ذمة "وكالة يقولون", إنزين؟ انا مالي شغل ... يقولون إن عددنا وصل إلى ثلاثة ملايين

زين سين سؤال ... لو ياخذون من كل صاحب معاش-حتى المتقاعد- دينار واحد فقط لا غير, وإذا عنده عيال فياخذون منه وعن كل واحد من عياله, يعني بالعربي جذي يدخل في حساب الدولة ثلاثة ملايين كل شهر... يعني سنوياً ستة وثلاثين مليون, بالله مبلغ مثل هذا ما يصرفونه على ترقيع نظام صرفنا الصحي اللي قاعد يطفح لنا كل شويتين بمنطقة؟

ما يسنعون مستشفياتنا ومدارسنا؟

ما يسوون لنا شبكة

underground

مثل العالم والناس تحل أزمة المرور؟

ما يبنون لنا محطة كهربا تشتغل على الطاقة الشمسية مثل اللي بكاليفورنيا وإسرائيل؟

ما ينصرف على تأهيل ذوي الإحتياجات الخاصة اللي على الله ثم أهلهم, اللي هم أنفسهم في حالات كثيرة ينقصهم الوعي اللازم للتعامل مع إحتياجات أبناءهم؟

بس الواحد شيقول غير إنه يسأل سؤال أخير ... شنو وجه التشابه بين الكويت والبطيخ؟

!الجواب ... أثنينهم يحتوون عالأسود والأحمر والأخضر والأبيض

بس لأني متفاءلة راح أختم واقول ... الرقية يا حمرة يا قرعة

بالآونة الأخيرة طلعت معانا قرعة جم مرة-بكل أسف

لكن مصيرها تطلع حمرة

وأنا قلبي دليلي

على قولة ليلى مراد ;)

قرت عينكم

hey 7abayby :D

واااااااااااااااي! الله أنا شكثر ولهانة عليكم, ودي أطلع لكم من الشاشة وأعطيكم لمة هالكبر

إي والله ... إي والله... ما كنت عارفة شسوي بعمري وأنا بعيدة عن مدوناتكم, بس ما عليه

don't worry ... be happy

do not feer because ezain is here

فمن منطلق هالمناسبة السعيدة إسمحوا لي أهني سمو الأمير وولي عهده الأمين, وباقي أعضاء حكومتنا الرشيدة ومجلسنا الموقر وعموم أبناء الشعب الكويتي الكريم, وكافة الوافدين والمقيمين بما فيهم العاملين في عصير الضاحية, خصوصاً "محمد" اللي يشاوط بين المحل والمسافط دون كلل أو ملل, و"هدايت" اللي لازق بالدريشة غير آبه بحرارة الصيف او برد الشتاء, وطبعاً أهنيكم أنتوا قرائي الأحبة ... مدونيني الزملاء الأعزاء, برجوعي لكم سالمة غانمة, ولافة الأكو والماكو بمحلات أمريكا العامرة

كما أهني الأقارب والأصحاب والجيران, من حدود قرطبة وصولاً لخيطان

عسى الله يسعدكم جميعاً وتلاقون التوفيق بكل مكان

وسلام مربع يا جدع وعالنبي صلي

والحين بعد هالفصلة المحترمة اللي إحتمال وارد تكون بسبب إن نومتي للحين معتفسة من السفر, أو بسبب الفول اللي كليته قبل شوي, أو بسبب فيوزات مخي الضاربة من الله-وأنا شخصياً أرجح الإحتمال الأخير, أحب أقدم لكم وبدون مزيد من التأخير

My Pictures

الجزء الأول

هذا بلك أباجورة في قاعة دسمان في مطار الكويت الدولي... زغروطة يا ولاد ... صكينا على مطار دبي

هذي إيدي وأنا ناطرة يعطونا غرفنا بنيويورك

واللي مصورتني بنت ولد جيرانا أيام كنا ساكنين رميثية, إسم الله عليها عمرها 4 سنين وتعرف تصور عدل, زفتني يوم تحركت وما خليتها تصورني, إهي وأهلها كانوا ويانا بالصدفة على نفس الطيارة ونزلنا بنفس الفندق... كانت صدفة فعلاً حلوة

هني أهلي ناموا بالفندق اللي نزلنا فيه بهيوستن

هذي واحدة من المخدات الناعمة اللي ناموا عليها
... مكتوب

sweet dreams

وهني أنا نمت ... الشكوى لله

هو صح القنفة تنقلب فراش بقدرة قادر, بس مثل ما أنتوا خابرين من زود العيز ... أقصد السنع اللي فيني مابي كل شويتين أطلع الفراش وآخذ مساحة من الصالة وأزعج اللي بيقعد فيها

نادرة ... عسى الله يخليني لأميمتي

هذا منظر السما من البلكونة مثل ما كنت اشوفه من الدور ال22

تكملة المشهد

أنتوا عاد لزقوا الصورتين ببعض علشان تطلع لكم الصورة مثل ما كنت شايفتها, وإذا ما ركبوا على بعض تشطروا وإملوا الفراغ

مع إن جني مصورتهم بيومين مختلفين... بس عادي

منظر السما وشلون تتلون بالغيوم يسحرني

هذي زينة ال

Galleria

حق الكريسماس والسنة اليديدة
يقولون إنه خامس اكبر مول بأمريكا

شجرة الكريسماس

إمتدت من الدور الأرضي... للأول ... للثاني

WOW من قلب

باقي الزينة اللي تدندلت من السقف

أوكي... ما قدرت أقاوم إني ما أصورها, مع إني مو زود عالكاديلاك بس منظرها شوقني, وأشونها مو

ESCALADE

!جان يمكني تعلقت بالبوستر

صالة التزلج بالدور الأرضي

...بس ما لعبت لسببين
واحد ... برد ... أثنين ... ما أعرف ... هيهي

أدري أفشل خصوصاً وإن زبابيط النقعة عيالهم يعرفون, وحتى والله عيالنا, بس عذري إني ياية من صحرا... كيفي

يحليلهم... هالشجر المزين بالليتات ذكرني ببيت في قرطبة على الدوار, أصحابه مزينين نخلهم كله... الساق والسعف

To Be Continued ...

...وحق اللي ثقافته إيطالي

إلى اللقاء في الحلقة القادمة

take care 7abayby ... love u all **********

وبعدين؟

شنو بعد هالخبة هذي كلها اللي أنا سويتها لكم في البوست اللي طاف واللي قبله؟

قبل لا اجاوب خلوني أسالكم وأتطمن عليكم أول... شلونكم وشخباركم حبايبي؟ وشلون الكويت وأهلها؟ حدي مشتاقة لكم

أنا الحين قاعدة اكتب لكم هالبوست من بلاد العم سام على قولتهم, ووعد مني إني بس أرجع الديرة راح أعطيكم نشرة مفصلة ومصورة عن يومياتي التحفة

بس نرجع لموضوعنا... وبعدين؟

وصلني منكم 33 تعليق بالتمام والكمال... 3 محذوفين من اللي كاتبهم... 7 منهم كانوا مدح ودعم معنوي-يا أنا! ... 3 مو فاهمين أنا شقاعدة أقول-يا فرحتي... 3 شايفين الديرة حلوة وما فيها إلا العافية ومو عاجبهم إن إحنا نتحلطم... 1 صاحبه يبي يروح المطبخ-لسبب ما يعلم فيه إلا رب العالمين ... 1 يتساءل عن آلية الإصلاح ... 1 ينادي بأهمية الوعي وإن من خلاله راح تنصلح الأمور... والباقيات الصالحات واللي عددهم 13 مدون واكتبوا 14 تعليق, كانت تعليقاتهم تتراوح ما بين تدني مستوى التعليم والصحة... القبلية والطائفية... الواسطة والفساد... وسوء الإدارة... وتدهور الأخلاقيات والإهتمام المبالغ فيه بالمظاهر والماديات... وتعاسة الوضع السياسي وعدم تطبيق القوانين وما ينص عليه الدستور... وإرتفاع معدلات الجريمة ومشاكل الزحمة والسرعة

مثل ما أنتوا شايفين يا قرائي الأعزاء مشاكل الديرة كل واحدة فيهم تقول أنا أتعس من اللي يمي, وفي ظل حكومة جامدة, و مجلس ... الله بالخير, الكويت ما بقى لها غير عيالها اللي ما بين ناس تقول "ماكو إلا العافية" وناس تقول "ماكو فايدة" ... هممممممم

يا جماعة الخير الكويت حلوة ... إي ... ما إختلفنا, لكنها ممكن تكون أحلى

الكويت ملعوب بحسبتها من الواسطة والفساد والجهل وعدم الكفاءة والبيروقراطية (يعني الطوالة اللي مالها داعي في الإجراءات وتقديس القوانين مهما كانت غبية) مما يخلي إزدهارنا وتقدمنا من المستحيلات

متأكدة إنكم تعرفون مثل ما أنا عارفة إن مشاكلنا تحتاج أشخاص

واحد... متخصصين أو على الأقل عندهم الوعي الكافي اللي يخليهم مؤهلين لتحليل وحل هالمشاكل

أثنين ... عندهم النفوذ والموارد المادية والبشرية الكافية لتطبيق الحل

واحد متوفر عندنا ولله الحمد, أما أثنين ... إحنا مافي جدامنا غير طريج واحد للخروج من هالدوامة اللي إحنا فيها, وهي إن إحنا نتعاون مع بعضنا البعض كلٍ في مجاله وتخصصه لحل المشاكل اللي تهمه بشكل مباشر

صححوني إذا انا غلطانة:

أبلة خروفة... ما تبين أحد يوقف معاج ضد جمود المناهج وإهمال بعض أولياء الأمور حتى تشوفين بناتج الطالبات يوصلون لأعلى مستوى؟

حمد ... ما ودك تشوف الديرة تشتغل فيها الكهربا على الطاقة الشمسية أو أي طاقة صديقة للبيئة؟

سلوز ... ما ودج شوية إنصاف بحق الجامعيين ومستقبل وظيفي باهر؟

كله مطقوق ... ما مليت من طلب الكتب من الإنترنت؟

نجومة ... ما تبينا نوقف تحلطم؟

عثماني ... ما تبي أسامي سنعة تقراها في الجرايد غير حليمة بولند وضيوف الله؟

مثل ما نفزع لبعض للتوسط لوظيفة, إحنا محتاجين إلى إن إحنا نساند بعضنا في تحقيق أحلامنا وحل مشاكلنا... مشاكل الديرة

إنت كنت تتساءل عن الآلية ... الآلية ببساطة هي إن إحنا ننشر المزيد من الوعي بين الناس بشكل عام من خلال مدوناتنا eng_q8

أو في أي محيط نكون فيه, ونوصل صوتنا أو بمعنى أصح "إقتراحنا" لحل مشكلة معينة لكل من يقدر يساعد

يا جماعة الأمور ما راح تنصلح بروحها ولا بيوم وليلة, وإذا إحنا كمدونين اللي شاطين عمرنا ببلوقاتنا ما سوينا شي, شخلينا حق غيرنا؟

بكل اسف وقتي على هالكمبيوتر خلص, ويمكن ما اقدر أحط بوست ثاني إلا على نهاية الشهر... موعد رجعتي للديرة, لكن راح أحاول أكتب جم تعليق في بلوقاتكم بس ما أوعدكم, أعتذر منكم إن سفرتي يت بوقت بايخ شوي ... بالوقت اللي كان لازم إني أجابل البلوق اكثر من اي وقت ثاني

حافظكم الله حبايبي وبوساتي وبوستاتي لكم ... ويا بوعسكر... هيهي ... الله يعطيك حجي ;)

سؤال ورد غطاه round 2

helaw جميعاَ... :D

شاكرة تفاعلكم ويعطيكم الف عافية, و هذا مو غريب عليكم

أنا بس حبيت أذكركم بنقطة صغيرة يمكن تكون سقطت سهواً ... لما تصير كارثة... أياً كان نوعها... شنو أول شي يسوونه بعد تنفيذ عمليات الإنقاذ الطارئة؟

إحصاء للخسائر... هذا اللي يسوونه... كشف كامل وشامل بكل شي صار, حتى يقدرون يتبصرون عدل ويعرفون من وين يبدون, ويطلعون من الأزمة

إذا قائمة كل واحد فيكم طويلة... ما عليه... قسطوها... يشرفني ويسعدني ترددكم الدائم عالبلوق, في النهاية البلوق بلوقكم وإيد واحدة ما تصفق, ولا شلون؟

سؤال ورد غطاه

hey there 7abayby :D

how wuz ur new year celebration? daye5 mithil mine or full of action, ha?
3ady ... 3ady ... goolow la tisti7oon... kilna here above 18 ;D

لووووووووووووول ... كل عام وأنتوا بخير وعساها سنة سعيدة عليكم جميعاً حبايبي... تتمتعون فيها بالصحة والعافية وتتحقق فيها كل احلامكم وآمالكم... ولا اقول... مو كلها.... خلوا شي حق السنة اللي وراها

ما تبون؟ ... يكون أحسن بعد...خير البر عاجله, وإذا رادة عالأحلام فهي ما تخلص إلا بنهاية عمر البني آدم-لكم طولة العمر, وأتصور اشخاص مبدعين مثلكم ماراح يكون عندهم اي مشكلة في السعي وراء فكرة جميلة وإنجاز رائد, ولا أنا غلطانة؟

زين دام رفعت معنوياتكم وونستكم جذي وخليتكم تصدقون عمركم... أبي منكم خدمة ما عليكم أمر... يعني تبوني أساحلكم ببلاش؟ خو ما يصير!

هيهيهي... لا حشا والله مو مساحل... إلا كلام من القلب ...لا... وبعد شهادتي فيكم مجروحة

أنا صح لي الحين ما تشرفت بمعرفة كل واحد وواحدة فيكم شخصياً, بس يكفي إن أي شخص يلقي نظرة على مدوناتكم ويقرأ بوستاتكم... سواء كان شعر... تحلطم... صور ... نكتة أو تعليق على شي غريب صادفتوه... تحليل وضع سياسي أو إقتصادي أو إجتماعي... أومذكرات... أنا أجزم بأن القارئ لكم راح ينبهر بمستوى عقليتكم وثقافتكم

أوكي ... أنا أقدر أتخيل بعضكم الحين يقول "هذي أكيد تبي بيزات!" ... لووووول ... أحب أطمئنكم... لأ

أنتوا الحين متوسط أعماركم... هممم... نقول 27؟ ... منكم اللي بعده يدرس واللي توه متخرج والأبو والأم اللي توهم-اسم الله عليهم- الله رازقهم بعيال... معظمكم ما بين أوائل العشرينات إلى نهاية الثلاثينات وتفكيركم راكز ونظرتكم ثاقبة في تقييمكم للأمور كأنكم تجاوزتم الخمسين, ومع هذا مقبلين على حياتكم بمرح كشباب ومستمتعين فيها من اروع ما يمكن-على الأقل هذا اللي أفهمه من قراءتي لكتاباتكم

غيركم مو جذي... أنتوا حالة إستثنائية!

أتمنى إنكم تكونون حسيتوا بقيمتكم ومدى أهميتكم لهالديرة الطيبة, واللي منكم ثقة وعارف هالشي من زمان أقوله ... صاج! وثقتك هذي مو على الفاضي

ولأنكم كل ما سبق هو اللي خلاني أفكر إني اطلب منكم هالطلب...

أبيكم-ما عليكم أمر- تجاوبون على السؤال التالي... شنو اللي مو عاجبكم بالديرة؟

وما أبيكم تكلفون على أنفسكم وتكتبون مقالات... يكفي تكون إجابتكم على شكل قائمة... نقاط.... رؤوس أقلام... تصف أي شي وكل شي مو عاجبكم... صغير كان او كبير

يعني كمثال... أنا ما يعجبني القذارة في الشوارع... مخرجات التعليم... مبانينا الحكومية المتهالكة والمهملة واللي ما تحمل تعبير عن الثقافة الكويتية... الإزدحام المروري... نوعية الأكل اللي يبيعونه بمقصف المدارس... إعتمادنا على النفط الخام دون تقوية الإقتصاد بمصادر دخل أخرى... منع الإختلاط... عدم تخصيص الأندية الرياضية ... تفييم الطالب عن طريق نظام الدرجات الذي يحدد مستوى أداء الطالب لكن ليس بالضرورة فهمه... التقطيع البايخ للأفلام بالسينما... دخول الأطفال لأفلام لا تتناسب وسنهم... إنتشار السرقة الفكرية من افلام وبرامج منسوخة.... عدم إبتسام الإمام أثناء خطبة الجمعة وتجهم وجهه حتى في المواضع اللي يتكلم فيها عن حب الله وحدة اسلوبه في الوعظ... والبقية تأتي

فأكون اكثر من شاكرة لكم لو تجاوبون بهالطريقة ليسهل دراسة كل نقطة على حدة-إي السالفة فيها دراسة- وربط النقاط ببعضها البعض ومعرفة تأثير كل منها على الأخرى, حتى يتم القضاء على كل ما يزعجنا ويسيئ لوطننا, لأن مثل ما انتوا شايفين... الوضع بالكويت أصبح-بكل اسف- مزري, وصرنا مثل اللي عايش في دوامة مو عارف يطلع منها, وتحلطمنا تحول إلى دوائر مفرغة ندور فيها حوالين أنفسنا

إحنا في أمس الحاجة إلى قائمة مبدئية بمشاكل الكويت بكل انواعها وتدرجاتها, وما عليه إن تكون هالقائمة عشوائية في البداية, ثم يتم ترتيب عناصرها حسب أولويتها ومدى سهولة او صعوبة تطبيق الحل والبدائل المتاحة

حلو؟

زين-بارك الله فيكم- أنا بخلي رابط لهالبوست على هامش البلوق حتى بسهولة كل ما أحد يخطر على باله شي يكتبه, وبعد ما تقولون لي خلاص ما عندنا شي, بنبتدي بمرحلة الترتيب... ثم الربط... يليها التدقيق والتمحيص في الحلول الممكنة... وآخر شي نقوم بالتطبيق

أنا متعمدة أستخدم أسلوب الجمع, لأن الديرة ديرتنا يميع وكلنا في الهوا سوا, ولا شلون؟

7afi'6kom allah 7abayby o big bosa 4 u all *

It's 2oo8!

hellooooooo dearz!

طبعاً أنتوا تعرفون المبدع "ناصر القصبي" مال طاش ما طاش؟ ... واحسرتنا! ما تعرفونه؟!

عاد كيفكم... أبي كل واحد فيكم يتخيله يقلد لهجة أهل الحجاز مدري وين ... اللي كلامهم قالب سعودي على مصري

ومرة واحدة تخيلوه إنه قلب بنية... مسيكين! هلقت بالريال... ما عليه... أمون :P

مرة مو بحلو الموديل

الدنيا كلها محتفلة طول الليل

وإحنا بس اللي قاعدين بالبيت

أففففف... والله مليت

إيش هزا؟!

شما أسوي ماني قادرة أستمتع ... أبغى أحس باللزازة

معقولة يكون فيروس الكآبة حاشني في القلب؟

مدري والله ... مو بعيدة

هالدنيا بنت ك*ب

تتحين الفرص لتغدر بالإنسان

وتخليه مو دال طريقه ودوم في همومه سرحان

بس لاااااااااا

على مين تلعبها؟

أنا واعية لحيلها وفاهمتها

بحتفل يعني بحتفل

ولا أنا ليه ماخذة إجازة من هذا ... إيش إسمه؟... إيوة! الشغل

بتفل عن شمالي بوجه إبليس ثلاث مرات

وأرمي الزعل بسبع جمرات

وبونس نفسي وهيص

وأغني نشاز والسغير قبل الكبير برقص

وبعد السواني في إنتزار السنة الجديدة

عساها يا ربي تكون عالجميع سعيدة

.... قبلاتي و

Habby Na'u Year :]

طارت الطيارة

طارت عنا الطيارة؟!

شنو يعني؟ محنا مسافرين؟

كلموا "ناسا" تطرش لنا صاروخ

شوفوا لنا عربانة تجرها حمارة

حسبي الله ونعم الوكيل

حتى البانزين خلص من السيارة

ولو بنترسه ماكو فايدة

الوقت تأخر وكلنا تعابة

ملينا من الزحمة ودخنا من الفرارة

وروسنا عورتنا وإحنا نسأل انفسنا شلون طارت عنا الطيارة

شششششش..... كل من ساكت

كل من بينام على ضوء الشوارع الخافت

شوي ... ولا كل من بدا يقط اللوم على الثاني ومزهب أعذاره

كل من بدا يلمح

الكل وده يصرح

الصوت علا

ومعظم النيران تبتدي من شرارة

كل هذا وأنا ميتة من اليوع ومو حاصل لي حتى خيارة

الله يسامح طاقم الطيارة

للأمانة التأخير كان خارج سيطرة أي واحد فينا

والله صج!... مو عيارة

الفكرة بالأساس كانت إن إحنا نروح السعودية

حق خوالي في المنطقة الشرقية

منها نعايدهم ومنها زوارة

ونرد ديرتنا عن طريق البحرين

من خلال هالمملكة الجميلة اللي كانت في يوم من الأيام إمارة

صراحة... اللي يشوف شموخ ابراجها اليوم

ما يصدق إنها بالأمس كانت مطشرة فيها جم عمارة

كفو والله!

جذي تكون النهضة

مو إحنا اللي شغلنا صاير كله خوارة بخوارة

مدري هو غضب من رب العالمين علينا؟ مدري هو سوء إدارة؟

يا ترى إحنا تنقصنا الخبرة؟

ولا مشاكل الديرة أعقد مما نتصور ومحتاجة جهود جبارة؟

يا ترى إحنا متعمدين نكون عين عذاري؟

ولا هذي ببساطة يسمونها هدارة؟

أتصور الأجوبة واضحة وما يبيلها شطارة

أخخخخيييييييييييييييييييييييه عليج يا كويت

والله خسارة

جرب فيج كل عليمي

حاصل على أعلى الدرجات في الثوارة

كله بالواسطة

والمصيبة يتباهى فيها ويقولها بصريح العبارة!

قلبي قلبج يا ديرتي

لعب بحسبتج كل راعي مصلحة

كل نذل في منتهى الحقارة

ذيب متنكر بثوب نعجة الإصلاح

المنفعة همه... الطمع في عينه... والدين ستاره

السموحة

مو كلهم

في ناس الدين هو قلبهم قبل لا يكون قالبهم وأطهر من الطهارة

وفي من الناس الرها هو شعاره

ضعيف نفس ... مسنود الظهر

يرتكب أبشع الجرايم وما يهمه إنه يخفي آثاره

يشخر في نومه وعيون عشاقج سهارى

تغمض تحاول تقرا مستقبلج

دمعها يهطل ...يدعي ... إن باجر إييبلج بشارة

أوه!

إندمجت معاج يالغالية

وسرحت في همومج ونسيت هالفقارى!!

بعد إذنج بس

أكمل لهم شلون طارت من غيرنا الطيارة

جسر الملك فهد من الزحمة كان راح يفيض سيايير

وأصحابها كانوا دفشين وفي منتهى القذارة

إيي من ورا وبقدرة قادر يصير جدام

واحد ... إثنين... عشر!

معقولة كلهم بيلحقون على الطيارة؟!

غير النقص الرهيب في الموظفين اللي في رايي الشخصي هو سبب هالعسارة

ما أطول عليكم...

الإزدحام إغتصب وقتنا وبرخيص باعه

تسإلوني عن الإقلاع؟

هيهي... بقى عليه أقل من ساعة!

خالي أعلن إستنفاره

داس وبتون

يبي يلحق قبل لا تطفي الإشارة

ويوم وصلنا

استقبلنا الموظف بإعتذاره

البوابة سكرت

مالكم حل... ماكو جارة

إلتفتنا على بعض وكل واحد يقول للثاني

ما عليه... كل تأخيرة فيها خيرة

وهالحكمة بحد ذاتها تنسف اي إحساس بالمرارة

من يدري؟

يمكن باجر نضحك ونقول

أشونا طارت عنا الطيارة