طارت الطيارة

طارت عنا الطيارة؟!

شنو يعني؟ محنا مسافرين؟

كلموا "ناسا" تطرش لنا صاروخ

شوفوا لنا عربانة تجرها حمارة

حسبي الله ونعم الوكيل

حتى البانزين خلص من السيارة

ولو بنترسه ماكو فايدة

الوقت تأخر وكلنا تعابة

ملينا من الزحمة ودخنا من الفرارة

وروسنا عورتنا وإحنا نسأل انفسنا شلون طارت عنا الطيارة

شششششش..... كل من ساكت

كل من بينام على ضوء الشوارع الخافت

شوي ... ولا كل من بدا يقط اللوم على الثاني ومزهب أعذاره

كل من بدا يلمح

الكل وده يصرح

الصوت علا

ومعظم النيران تبتدي من شرارة

كل هذا وأنا ميتة من اليوع ومو حاصل لي حتى خيارة

الله يسامح طاقم الطيارة

للأمانة التأخير كان خارج سيطرة أي واحد فينا

والله صج!... مو عيارة

الفكرة بالأساس كانت إن إحنا نروح السعودية

حق خوالي في المنطقة الشرقية

منها نعايدهم ومنها زوارة

ونرد ديرتنا عن طريق البحرين

من خلال هالمملكة الجميلة اللي كانت في يوم من الأيام إمارة

صراحة... اللي يشوف شموخ ابراجها اليوم

ما يصدق إنها بالأمس كانت مطشرة فيها جم عمارة

كفو والله!

جذي تكون النهضة

مو إحنا اللي شغلنا صاير كله خوارة بخوارة

مدري هو غضب من رب العالمين علينا؟ مدري هو سوء إدارة؟

يا ترى إحنا تنقصنا الخبرة؟

ولا مشاكل الديرة أعقد مما نتصور ومحتاجة جهود جبارة؟

يا ترى إحنا متعمدين نكون عين عذاري؟

ولا هذي ببساطة يسمونها هدارة؟

أتصور الأجوبة واضحة وما يبيلها شطارة

أخخخخيييييييييييييييييييييييه عليج يا كويت

والله خسارة

جرب فيج كل عليمي

حاصل على أعلى الدرجات في الثوارة

كله بالواسطة

والمصيبة يتباهى فيها ويقولها بصريح العبارة!

قلبي قلبج يا ديرتي

لعب بحسبتج كل راعي مصلحة

كل نذل في منتهى الحقارة

ذيب متنكر بثوب نعجة الإصلاح

المنفعة همه... الطمع في عينه... والدين ستاره

السموحة

مو كلهم

في ناس الدين هو قلبهم قبل لا يكون قالبهم وأطهر من الطهارة

وفي من الناس الرها هو شعاره

ضعيف نفس ... مسنود الظهر

يرتكب أبشع الجرايم وما يهمه إنه يخفي آثاره

يشخر في نومه وعيون عشاقج سهارى

تغمض تحاول تقرا مستقبلج

دمعها يهطل ...يدعي ... إن باجر إييبلج بشارة

أوه!

إندمجت معاج يالغالية

وسرحت في همومج ونسيت هالفقارى!!

بعد إذنج بس

أكمل لهم شلون طارت من غيرنا الطيارة

جسر الملك فهد من الزحمة كان راح يفيض سيايير

وأصحابها كانوا دفشين وفي منتهى القذارة

إيي من ورا وبقدرة قادر يصير جدام

واحد ... إثنين... عشر!

معقولة كلهم بيلحقون على الطيارة؟!

غير النقص الرهيب في الموظفين اللي في رايي الشخصي هو سبب هالعسارة

ما أطول عليكم...

الإزدحام إغتصب وقتنا وبرخيص باعه

تسإلوني عن الإقلاع؟

هيهي... بقى عليه أقل من ساعة!

خالي أعلن إستنفاره

داس وبتون

يبي يلحق قبل لا تطفي الإشارة

ويوم وصلنا

استقبلنا الموظف بإعتذاره

البوابة سكرت

مالكم حل... ماكو جارة

إلتفتنا على بعض وكل واحد يقول للثاني

ما عليه... كل تأخيرة فيها خيرة

وهالحكمة بحد ذاتها تنسف اي إحساس بالمرارة

من يدري؟

يمكن باجر نضحك ونقول

أشونا طارت عنا الطيارة