وبعدين؟

شنو بعد هالخبة هذي كلها اللي أنا سويتها لكم في البوست اللي طاف واللي قبله؟

قبل لا اجاوب خلوني أسالكم وأتطمن عليكم أول... شلونكم وشخباركم حبايبي؟ وشلون الكويت وأهلها؟ حدي مشتاقة لكم

أنا الحين قاعدة اكتب لكم هالبوست من بلاد العم سام على قولتهم, ووعد مني إني بس أرجع الديرة راح أعطيكم نشرة مفصلة ومصورة عن يومياتي التحفة

بس نرجع لموضوعنا... وبعدين؟

وصلني منكم 33 تعليق بالتمام والكمال... 3 محذوفين من اللي كاتبهم... 7 منهم كانوا مدح ودعم معنوي-يا أنا! ... 3 مو فاهمين أنا شقاعدة أقول-يا فرحتي... 3 شايفين الديرة حلوة وما فيها إلا العافية ومو عاجبهم إن إحنا نتحلطم... 1 صاحبه يبي يروح المطبخ-لسبب ما يعلم فيه إلا رب العالمين ... 1 يتساءل عن آلية الإصلاح ... 1 ينادي بأهمية الوعي وإن من خلاله راح تنصلح الأمور... والباقيات الصالحات واللي عددهم 13 مدون واكتبوا 14 تعليق, كانت تعليقاتهم تتراوح ما بين تدني مستوى التعليم والصحة... القبلية والطائفية... الواسطة والفساد... وسوء الإدارة... وتدهور الأخلاقيات والإهتمام المبالغ فيه بالمظاهر والماديات... وتعاسة الوضع السياسي وعدم تطبيق القوانين وما ينص عليه الدستور... وإرتفاع معدلات الجريمة ومشاكل الزحمة والسرعة

مثل ما أنتوا شايفين يا قرائي الأعزاء مشاكل الديرة كل واحدة فيهم تقول أنا أتعس من اللي يمي, وفي ظل حكومة جامدة, و مجلس ... الله بالخير, الكويت ما بقى لها غير عيالها اللي ما بين ناس تقول "ماكو إلا العافية" وناس تقول "ماكو فايدة" ... هممممممم

يا جماعة الخير الكويت حلوة ... إي ... ما إختلفنا, لكنها ممكن تكون أحلى

الكويت ملعوب بحسبتها من الواسطة والفساد والجهل وعدم الكفاءة والبيروقراطية (يعني الطوالة اللي مالها داعي في الإجراءات وتقديس القوانين مهما كانت غبية) مما يخلي إزدهارنا وتقدمنا من المستحيلات

متأكدة إنكم تعرفون مثل ما أنا عارفة إن مشاكلنا تحتاج أشخاص

واحد... متخصصين أو على الأقل عندهم الوعي الكافي اللي يخليهم مؤهلين لتحليل وحل هالمشاكل

أثنين ... عندهم النفوذ والموارد المادية والبشرية الكافية لتطبيق الحل

واحد متوفر عندنا ولله الحمد, أما أثنين ... إحنا مافي جدامنا غير طريج واحد للخروج من هالدوامة اللي إحنا فيها, وهي إن إحنا نتعاون مع بعضنا البعض كلٍ في مجاله وتخصصه لحل المشاكل اللي تهمه بشكل مباشر

صححوني إذا انا غلطانة:

أبلة خروفة... ما تبين أحد يوقف معاج ضد جمود المناهج وإهمال بعض أولياء الأمور حتى تشوفين بناتج الطالبات يوصلون لأعلى مستوى؟

حمد ... ما ودك تشوف الديرة تشتغل فيها الكهربا على الطاقة الشمسية أو أي طاقة صديقة للبيئة؟

سلوز ... ما ودج شوية إنصاف بحق الجامعيين ومستقبل وظيفي باهر؟

كله مطقوق ... ما مليت من طلب الكتب من الإنترنت؟

نجومة ... ما تبينا نوقف تحلطم؟

عثماني ... ما تبي أسامي سنعة تقراها في الجرايد غير حليمة بولند وضيوف الله؟

مثل ما نفزع لبعض للتوسط لوظيفة, إحنا محتاجين إلى إن إحنا نساند بعضنا في تحقيق أحلامنا وحل مشاكلنا... مشاكل الديرة

إنت كنت تتساءل عن الآلية ... الآلية ببساطة هي إن إحنا ننشر المزيد من الوعي بين الناس بشكل عام من خلال مدوناتنا eng_q8

أو في أي محيط نكون فيه, ونوصل صوتنا أو بمعنى أصح "إقتراحنا" لحل مشكلة معينة لكل من يقدر يساعد

يا جماعة الأمور ما راح تنصلح بروحها ولا بيوم وليلة, وإذا إحنا كمدونين اللي شاطين عمرنا ببلوقاتنا ما سوينا شي, شخلينا حق غيرنا؟

بكل اسف وقتي على هالكمبيوتر خلص, ويمكن ما اقدر أحط بوست ثاني إلا على نهاية الشهر... موعد رجعتي للديرة, لكن راح أحاول أكتب جم تعليق في بلوقاتكم بس ما أوعدكم, أعتذر منكم إن سفرتي يت بوقت بايخ شوي ... بالوقت اللي كان لازم إني أجابل البلوق اكثر من اي وقت ثاني

حافظكم الله حبايبي وبوساتي وبوستاتي لكم ... ويا بوعسكر... هيهي ... الله يعطيك حجي ;)